បើករថយន្តលឿនមិនប្រយត្ន័ជ្រុលទៅបុករថយន្តប្រមូលសំរាម សុីន ទ្រី គៀបជាប់តៃកុងរបួសធ្ងន់
ភ្នំពេញ៖ រថយន្តដឹកទឹកកក បើកលឿនដូចហោះមិនគោរពភ្លើងស្តុប ក៏ជ្រុលទៅបុករថយន្តប្រមូលសំរាម របស់ក្រុមហ៊ុន ស៊ិនទ្រី ពេញទំហឹងបណ្ដាលឲ្យតៃកុងរថយន្តដឹកទឹកកកគៀបជាប់ក្នុងកាប៊ីនរងរបួសធ្ងន់។
គ្រោះថ្នាក់ចរាចរណ៍ដ៏រន្ធត់នេះកើតឡើងនៅវេលាម៉ោង២ និង២០នាទីរំលងអាធ្រាត្រចូលថ្ងៃទី១១ខែតុលាឆ្នាំ២០១៩ នៅតាមបណ្ដោយផ្លូវវេងស្រេង ត្រង់ស្តុបសេះមាស ក្នុងភូមិ ដំណាក់ធំ៣ សង្កាត់ស្ទឹងមានជ័យ៣ ខណ្ឌ មានជ័យ ។
បើតាមប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្តកូរ៉េ ដឹកទឹកកក មួយគ្រឿងគ្មានស្លាកលេខ បើកបរដោយយុវជនម្នាក់ធ្វើដំណើរតាមបណ្ដោយផ្លូវវេងស្រេង ទិសដៅពីកើតទៅលិច ក្នុងល្បឿនយ៉ាងលឿន ខណៈមកចំណុចកើតហេតុភ្លើងស្តុុបក្រហម តែមិនឈប់ ស្របពេលដែលរថយន្តដឹកសំរាម របស់ ស៊ិនទ្រី បើកបរតាមផ្លូវ៣០ម៉ែត្រពីជើងទៅត្បូងឆ្លងផ្លូវបានពាក់កណ្ដាល ក៏ត្រូវរថយន្តដឹកទឹកកក បុកពេញទំហឹងបណ្ដាលឲ្យតៃកុងរថយន្ដដឹកទឹកកកគៀបជាប់រងរបួសធ្ងន់ធ្ងរ ភ្លាមៗប្រជាពលរដ្ឋជួយគាស់យកចេញដឹកយកទៅសង្គ្រោះនិងព្យាបាល នៅមន្ទីពេទ្យផងដែរ ។
ក្រោយពេលកើតហេតុសមត្ថកិច្ចជំនាញចុះមកវាស់វែងយករថយន្តទាំង២គ្រឿងទៅរក្សាទុកនៅការិយាល័យចរាចរណ័ផ្លូវគោក រាជធានីភ្នំពេញ រងចាំដោះតាមផ្លូវច្បាប់ ៕
