លួចម៉ូូតូបានសម្រេចយកមកសំងំដូរគ្រឿងត្រូវប្រជាពលរដ្ឋរាយការណ៍ប្រាប់សមត្ថកិច្ចចាប់វាយខ្នោះ
ភ្នំពេញ៖ សមត្ថកិច្ចឃាត់ខ្លួនជនសង្ស័យម្នាក់ បន្ទាប់ពីធ្វើសកម្មភាពលួចម៉ូតូPCX១គ្រឿងបានសម្រេចរួចជិះយកទៅសំងំដោះដូរគ្រឿងនៅក្រោយសាលាជម្ពូវន័
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១២និង៣០នាទីរសៀល ថ្ងៃទី១៥ ខែតុលា ឆ្នាំ២០១៩ នៅចំណុចខាងក្រោយសាលាបឋមសិក្សាជម្ពូវ័ន ភូមិជម្ពូវ័ន១ សង្កាត់ចោមចៅ៣ ខណ្ឌពោធិសែនជ័យ ។
ជនសង្ស័យដែលសមត្ថកិច្ចឃាត់ខ្លួនមានឈ្មោះ សុខ ណាង ភេទប្រុស អាយុ២៨ឆ្នាំ មុខរបរ កម្មករលីសែង ស្នាក់នៅភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ មានស្រុកកំណើត ខេត្តកំពង់ចាម ។ ចំណែកម៉ូតូ ដែលជនសង្ស័យលួចម៉ាក PCXពណ៌ស ពាក់ស្លាកលេខ ភ្នំពេញ1FK-2416 ។
សមត្ថកិច្ចបានឲ្យដឹងថា បើតាមសម្តីសារភាពរបស់ជនសង្ស័យ បានប្រាប់ថា កាលពីវេលាម៉ោង៤ទាបភ្លឺថ្ងៃទី១៥ខែតុលាឆ្នាំ២០១៩ ខ្លួនបានលួចម៉ូតូមួយគ្រឿងម៉ាកPCXពណ៌ស ពាក់ស្លាកលេខភ្នំពេញ1FK-2416នៅតាមបណ្ដោយ មហាវិថីឈ្នះ ឈ្នះ តែមិនច្បាស់ចំណុច ភូមិសង្កាត់ ហើយបានអូសយកមក ដាក់នៅក្នុងបរិវេណសាលារៀនជម្ពូវ័ន ដោះដូរគ្រឿងមួយចំនួន លុះដល់វេលាម៉ោងខាងលើ ក៏ត្រូវនគរបាលទៅដល់ចាប់ខ្លួនតែម្តង ។
សមត្ថកិច្ចបន្តថា ការឃាត់ខ្លួនជនសង្ស័យធ្វើឡើងបន្ទាប់ពីមានប្រជាពលរដ្ឋរាយការណ៍មកកម្លាំងសមត្ថកិច្ច ខណៈប្រទេះឃើញជនសង្ស័យ មានម៉ូតូយកមកដោះដូរគ្រឿងព្រោះមិនដែលឃើញជនសង្ស័យមានម៉ូតូជិះភ្លាមៗនោះកម្លាំងសមត្ថកិច្ចបានចុះទៅគ្រាន់តែក្រឡេកឃើញ ជនសង្ស័យបានរត់គេច ខ្លួនធ្លាក់ទឹកត្រូវកម្លាំងសមត្ថកិច្ចចាប់បានយកមកសួរនាំនៅប៉ុស្តិ៍នគរបាលចោមចៅ៣ ។
បច្ចុប្បន្ន ជនសង្ស័យត្រូវបានសមត្ថកិច្ចធ្វើការសាកសួរនិងកសាងសំណុំរឿងបញ្ជួនទៅ អធិការនគរបាល ខណ្ឌពោធិសែនជ័យដើម្បីចាត់ការតាមនិតិវិធីច្បាប់ ៕
