ឃាត់ខ្លួនជនសង្ស័យប្រុសស្រី៤នាក់ដកហូតថ្នាំញៀនបាន៦កញ្ចប់
ភ្នំពេញ៖ កម្លាំងនគរបាល ខណ្ឌដង្កោ ឃាត់ខ្លួនជនសង្ស័យប្រុសស្រី៤នាក់ពាក់ព័ន្ធករណី ប្រើប្រាស់និងជួញដូរគ្រឿងញៀនខុសច្បាប់ និងដកហូតថ្នាំញៀន៦កញ្ចប់
ហេតុការណ៍ឃាត់ខ្លួនធ្វើឡើងកាលពីម៉ោង២និង៣០ រសៀលថ្ងៃទី១៦ខែតុលាឆ្នាំ ២០១៩ នៅចំណុចផ្លូវលំ ភូមិបាគូ សង្កាត់ដង្កោខណ្ឌដង្កោ។
ជនសង្ស័យដែលសមត្ថកិច្ចឃាត់ខ្លួនរួមមាន៖ ទី១-ឈ្មោះ មឿង កាណាល់ ភេទប្រុស អាយុ៣៣ឆ្នាំ មុខរបរកម្មករសំណង់ មានទីលំនៅ ភូមិបាគូ សង្កាត់ដង្កោ ខណ្ឌដង្កោ ។
២-ឈ្មោះ ហៀង រ៉ា ភេទប្រុស អាយុ៣៦ឆ្នាំ មុខរបរជាងផ្សាដែក មានទីលំនៅ ភូមិបាគូ សង្កាត់ដង្កោ ខណ្ឌដង្កោ ។
៣-ឈ្មោះ ឌី ស្រីពៅ ភេទស្រី អាយុ៣២ឆ្នាំ មុខរបរកម្មការិនីរោងចក្រ ស្នាក់នៅភូមិអន្លង់គង សង្កាត់ព្រៃស ខណ្ឌដង្កោ ។
៤-ឈ្មោះ គិត ដារាវិន ភេទស្រី អាយុ១៨ឆ្នាំ មុខរបរនៅផ្ទះ មានទីលំនៅ ភូមិកែណរ សង្កាត់ក្រាំងធ្នង់ ខណ្ឌសែនសុខ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានប្រាប់ឲ្យដឹងថាដោយសារតែមានការរាយការណ៍ពីប្រជាពលរដ្ឋថានៅបន្ទប់ជួលកើតហេតុខាងលើមានក្មេងៗចេញចូលរៀងរាល់យប់ថ្ងៃលោកក៏បានបញ្ជាកម្លាំងដឹកនាំដោយលោកវរសេនីយ៍ទោ ជាង ហុកសែ អធិការរងនគរបាល ខណ្ឌដង្កោ និងលោកអនុសេនីយ៍ឯក តុន តូនី នាយប៉ុស្តិ៍រដ្ឋបាលដង្កោចុះទៅដល់បន្ទប់ជួលចំណុចកើតហេតុនិងបានឃាត់ខ្លួនជនសង្ស័យប្រុសស្រីចំនួន៤នាក់ ដកហូតថ្នាំញៀនបាន៦កញ្ចប់និងបាននាំខ្លួនជនសង្ស័យមកសាកសួរផងដែរ ។
បច្ចុប្បន្ន ជនសង្ស័យប្រុសស្រីទាំង៤នាក់រួមនិងវត្ថុងាំតត្រូវបានសមត្ថកិច្ច ធ្វើកំណត់ហេតុកសាងសំណុំរឿងដើម្បីបញ្ជូនទៅតុលាការចាត់ការតាមច្បាប់ ៕
