ចាប់បានហើយ ឃាតកកាប់សម្លាប់ស្រ្តីមេម៉ាយកូន២ម្នាក់នៅខេត្ដតាកែវ
តាកែវ៖ ប្រើពេលជាង១០ម៉ោងកម្លាំងជំនាញស្នងការដ្ឋាននគរបាលខេត្ត តាកែវ សហការជាមួយកម្លាំងអធិការដ្ឋាននគរបាលស្រុកសំរោង ក្រោមការដឹកនាំបញ្ជាផ្ទាល់របស់ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បង្ក្រាបបានជនសង្ស័យក្នុងសំណុំរឿងមនុស្សឃាតដោយចេតនានៅស្រុកសំរោងបានដោយជោគជ័យ ។
យោងតាមរបាយការណ៍បឋមរបស់អធិការនគរបាលស្រុកសំរោងបានឱ្យដឹងថា នៅវេលាម៉ោង០៥និង៣០នាទី ថ្ងៃទី២២ ខែតុលា ឆ្នាំ២០១៩ មានរណីមនុស្សឃាតមួយកើតឡើងនៅចំណុចមុខក្លោងទ្វារចូលសាលាវិទ្យាល័យ ប៊ុនរ៉ានី ហ៊ុន សែន ភ្នំជីសូរ ស្ថិតក្នុងភូមិដកពរ ឃុំរវៀង ស្រុកសំរោង ខេត្តតាកែវ បង្កឡើងដោយជនសង្ស័យ ឈ្មោះ សែម ហាក់ឡី ភេទប្រុស អាយុ៣១ឆ្នាំ មុខរបរជាងកាត់សក់ មានទីលំនៅភូមិពោធិ៍ ឃុំស្លា ស្រុកសំរោង ខេត្តតាកែវ បានធ្វើសកម្មភាពយកកាំបិតតាំងតោកាប់ទៅលើជនរងគ្រោះឈ្មោះ ហៀង សុខុន ភេទស្រី អាយុ៣៥ឆ្នាំ មុខរបរលក់ដូរ មានទីលំនៅភូមិ-ឃុំជាមួយគ្នា បណ្ដាលឱ្យស្លាប់ភ្លាមៗនៅកន្លែងកើតហេតុ ខណៈពេលជនរងគ្រោះកំពុងជិះម៉ូតូទៅផ្សារ ក្រោយពេលធ្វើសកម្មភាពរួច ជនសង្ស័យបានជិះម៉ូតូរត់គេចខ្លួនបាត់ ។
ក្រោយពីទទួលបានព័ត៌មានភ្លាម ឯកឧត្ដម ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានបញ្ជាកម្លាំងជំនាញ អធិការដ្ឋាននគរបាលស្រុកសំរោង ដឹកនាំដោយលោកវរសេនីយ៍ឯក មឿង សារុន អធិការនគរបាលស្រុក ចុះប្រតិបត្តិការក្តៅ តាមចាប់ខ្លួនជនសង្ស័យខាងលើឱ្យខានតែបាន ។
បន្ទាប់ពីធ្វើការស្រាវជ្រាវ និងតាមដានយ៉ាងហ្មត់ចត់ នៅវេលាម៉ោង០៧និង០០នាទី យប់កម្លាំងជំនាញបានឃាត់ខ្លួនជនសង្ស័យខាងលើបាននៅចំណុចកំពង់ចំឡងស្វាយជ្រុំស្ដិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ និងបាននាំខ្លួនជនសង្ស័យមកស្នងការដ្ឋាននគរបាលខេត្តតាកែវ ដើម្បីសាកសួរបន្ត ។
បច្ចុប្បន្ន ជនសង្ស័យកម្លាំងជំនាញធ្វើការនិងកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការបន្តតាមផ្លូវច្បាប់ ៕
