រន្ធត់ណាស់! ម៉ូតូ២គ្រឿងបុកគ្នាពេញទំហឹងស្លាប់បុរសម្នាក់និង៥នាក់ផ្សេងទៀតរបួសធ្ងន់ស្រាល
ភ្នំពេញ ៖ បុរសម្នាក់បានស្លាប់ភ្លាមៗនៅនិងកន្លែងយ៉ាងអាណោចអធម៌ ចំណែក៥នាក់ផ្សេងទៀតបានរងរបួសធ្ងន់និងស្រាល ក្នុងហេតុការណ៍គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាពេញ ទំហឹង កាលពីវេលាម៉ោង១១យប់ថ្ងៃទី២៣ខែតុលាឆ្នាំ២០១៩ នៅចំនុចក្បែរស្ពាកកំពង់ទួល តាមបណ្ដោយផ្លូវជាតិលេខ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។ សពជនរងគ្រោះមានឈ្មោះ សុ វិនដា ភេទប្រុស អាយុ៣២ឆ្នាំ ជនជាតិខ្មែរ មានស្រុកកំណើត ភូមិតាកុច ឃុំដើមឬស ស្រុកកណ្ដាលស្ទឹង ខេត្តកណ្ដាល។ ចំណែក៥នាក់ទៀតដែលរងរបួសធ្ងន់និងស្រាល មិនបានស្គាល់អត្តសញ្ញាណនោះទេ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសរងគ្រោះដែលស្លាប់ បានជិះម៉ូតូមួយគ្រឿងម៉ាក សងកូរ៉េ ពណ៌ក្រហម គ្មានស្លាកលេខ ឌុបប្រពន្ធនិងកូនតូចម្នាក់អាយុប្រហែល៥ឆ្នាំ ធ្វើដំណើរតាមបណ្ដោយផ្លូវជាតិលេខ៣ ទិសដៅពីត្បូងទៅជើង ក្នុងល្បឿនល្មមខណៈ មកដល់ចំណុចកើតហេតុ ស្រាប់តែមាន ម៉ូតូមួយគ្រឿងទៀតម៉ាក ហុងដាឌ្រីមស៊េរីឆ្នាំ២០១៩ ពណ៌ខ្មៅ ពាក់ ស្លាកលេខ កំពង់ស្ពឺ1J-9864ជិះឌុបគ្នា៣នាក់ តាមបណ្ដោយផ្លូវជាតិលេខ៣ បញ្ច្រាស់គ្នាក្នុងល្បឿនយ៉ាងលឿន មិនប្រយត្ន័ក៏បានជ្រុលទៅបុកជាមួយម៉ូតូសង់កូរ៉េ ចំពីមុខពេញទំហឹង បណ្ដាលឲ្យបុរសម្នាក់ ភាគីខាងម៉ូតូសង់កូរ៉េ ស្លាប់ភ្លាមៗនៅនិងកន្លែង ឯប្រពន្ធនិងកូនតូចរងរបួសធ្ងន់ស្រាល ចំណែកខាងម៉ូតូ ឌ្រីមសង់មានគ្នា៣នាក់ ក៏រងរបួសធ្ងន់ស្រាលផងដែរ ហើយភ្លាមៗត្រូវបានរថយន្តសាមុយដឹកយកទៅសង្គ្រោះនិងព្យាបាលនៅមន្ទីរពេទ្យ ។ ក្រោយកើតហេតុ សមត្ថកិច្ច ជំនាញបានចុះមកធ្វើកំណត់ហេតុប្រគល់សពជនរងគ្រោះអោយទៅសាច់ញាតិយកធ្វើបុណ្យតាមប្រពៃណី ។ ចំណែកម៉ូតូទាំង២គ្រឿងសមត្ថកិច្ចវាស់វែងយកទៅរក្សាទុកនៅអធិការខណ្ឌដង្កោ ដើម្បីកសាងសំណុំរឿងចាត់ការបន្តតាមនិតិវិធីច្បាប់ ៕
