ជនជាតិចិនបើករថយន្តបុករថយន្តជនជាតិខ្មែរ របួសធ្ងន់ស្រាល៧នាក់
ភ្នំពេញ៖ បុរសជនជាតិចិនម្នាក់បើករថយន្តតូយ៉ូតាព្រូសលឿនដូចហោះមិនប្រុងប្រយត្ន័ជ្រុលទៅបុករថយន្ត ហាយឡិនឌ័រកំពុងបត់ឆ្លងផ្លូវបណ្តាលបុរស២នាក់រងរបួសធ្ងន់និង៥នាក់ទៀតរបួសស្រាល។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១យប់ថ្ងៃទី២៧ ខែតុលា ឆ្នាំ ២០១៩ នៅតាមបណ្តោយផ្លូវ សហព័ន្ធរុស្ស៊ីកែងនឹងផ្លូវលេខ២៦១ ក្នុងសង្កាត់ទឹកល្អក់១ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញ រថយន្តមួយគ្រឿងម៉ាកហាយឡែនឌ័រពណ៌ស ពាក់ស្លាក លេខ ប-មានជ័យ2A-9636 បើកបរដោយបុរសម្នាក់និងមានអ្នករួមដំណើរនិង៦នាក់ទៀត ធ្វើដំណើរតាមបណ្តោយផ្លូវសហព័ន្ធរុស្ស៊ីទិសដៅពីកើតទៅលិច ខណៈមកដល់ចំណុចកើតហេតុ បានបត់ឆ្វេងទៅផ្លូវ២៦១ជិតផុតទៅហើយស្រាប់តែមានរថយន្តតូយ៉ូតាព្រូសមួយគ្រឿងពណ៌កណ្ដុរប្រមេះ ពាក់ស្លាកលេខសៀមរាប2B-5484បើកបរដោយបុរសជនជាតិចិនម្នាក់ មកបញ្ច្រាស់ទិសដៅគ្នាពីលិចទៅកើត បោះពួយយ៉ាងលឿនមិនប្រយត្ន័ជ្រុលទៅបុកចំកង់រថយន្តខាងក្រោយចំហៀងខាងស្ដាំពេញទំហឹងបណ្តាលឲ្យរថយន្តហាយឡែនឌ័របោកផ្ទប់នឹងបង្គូលភ្លើងស្តុបរបួសធ្ងន់ ២នាក់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនិងព្យាបាល ។ ចំណែក ៥នាក់ទៀតរងរបួសស្រាល។ រីឯរថយន្តទាំង២គ្រឿងខូចខាតយ៉ាងដំណំ ។
ក្រោយកើតហេតុសមត្ថកិច្ច ជំនាញចុះមកធ្វើការវាស់វែងយករថយន្តទាំង ២គ្រឿងទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំធ្វើការដោះស្រាយគ្នាទៅតាមច្បាប់៕
