បើករថយន្តលឿនមិនប្រយត្ន័ដល់ផ្លូវបត់បួងចង្កូតមិនទាន់ជ្រុលបុករថយន្ត មួយគ្រឿងទៀតចតនៅចញ្ចើមផ្លូវក្រឡាប់ខ្លួនឯង
ភ្នំពេញ ៖ បុរសម្នាក់បើករថយន្តរ៉េហ្វ័រ លឿនដូចហោះមិនប្រយត្ន័បត់ឆ្វេងបួងចង្កូតមិនទាន់ជ្រុលទៅបុករថយន្ត ស្តារិច ចតស្ងៀមលើចិញ្ចើមផ្លូវ បណ្តាលឲ្យរថយន្តរ៉េហ្វរក្រឡាប់ផ្ងារជើងមួយចំហៀង ខូចខាតទាំង២គ្រឿង គ្រោះថ្នាក់ចរាចរណ៍នេះកើតឡើងកាសពីវេលាម៉ោង០១និង៣០នាទី រំលងអធ្រាត្រឈានចូលថ្ងៃទី១៤ខែវិច្ឆិកាឆ្នាំ២០១៩ នៅចំណុច ខាងកើតវត្តកោះ ប្រហែល៥០ម៉ែត្រ ស្ថិតក្នុងសង្កាត់ បឹងរាំង ខណ្ឌដូនពេញ ។
តាមប្រភពនៅកន្លែងកើតហេតុបានឲ្យដឹងថា មុនដំបូងគេឃើញរថយន្តរ៉េហ្វរ ពណ៌ទឹកប្រាក់ ពាក់ស្លាកលេខភ្នំពេញ2Z-3152បើកដោយបុរសម្នាក់ ធ្វើដំណើរតាមផ្លូវ៦៣ទិសដៅពីត្បូងទៅជើងក្នុងល្បឿនយ៉ាងលឿនមិនប្រុងប្រយត្ន័ ខណៈមកដល់ចំណុចកើតហេតុ បានបត់ឆ្វេងឆ្លងទៅផ្លូវ ១៧៨ តែបួងចង្កូតមិនទាន់ជ្រុលឡើងចញ្ចើមផ្លូវទៅបុករថយន្ត ស្តារិច ពណ៌ខ្មៅ ពាក់ស្លាកលេខភ្នំពេញ 2AX-6593 ដែលចតស្ងៀមនៅលើចញ្ចើមពេញទំហឹងបណ្តាលឲ្យរថយន្តរ៉េហ្វរក្រឡាប់ផ្ងារមួយចំហៀង ។
ប្រភពបន្តថា បន្ទាប់ពីកើតហេតុភ្លាមៗតៃកុងរថយន្ត រ៉េហ្វរ បានបើកទ្វាររថយន្ត ចេញមកក្រៅតែពុំមានរងរបួសនោះទេ ។ ចំណែករថយន្តទាំង២គ្រឿងរងការខូចខាតយ៉ាងដំណំ ។ ក្រោយពេលកើតហេតុសមត្ថកិច្ចមូលដ្ឋានបានមកដល់ឲ្យភាគីទាំង២សម្របសម្រួលគ្នាដោយខាងរថយន្តរ៉េហ្វរព្រមសងសំណងទៅយកខាងរថយន្ត ស្តារិច ដើម្បីបញ្ចប់រឿងនៅនិងកន្លែងកើតហេតុ៕
