សង្ស័យចេះបើករថយន្តស្ទើរភ្លើងបើកធ្លាក់ប្រឡាយទឹកស្អុយ
ភ្នំពេញ ៖ យុវជនម្នាក់បានបើករថយន្តលឿនខ្វះការប្រុងប្រយត្ន័ដល់ផ្លូវបត់វ៉ាក់និងម៉ូតូបួងចង្កូតមិនទាន់ជ្រុលធ្លាក់ចូលប្រឡាយទឹកស្អុយបង្កការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី១៤ខែវិច្ឆិកាឆ្នាំ២០១៩ នៅចំណុចក្រោយ វត្តទួលសង្កែ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនដំបូងគេឃើញរថយន្តមួយគ្រឿងម៉ាក វីស្តូ ពណ៌ស្លាទុំ ពាក់ស្លាកលេខភ្នំពេញ 2R-5081 បើកតាមបណ្តោយផ្លូវបេតុងទិសដៅពីជើងទៅត្បូង លុះមកដល់ចំណុចកើតហេតុ បានគេចម៉ូតូចំនួន២គ្រឿង ហើយបួងចង្កូត បណ្ដាលឲ្យរថយន្តហោះផ្លោងចូលទៅក្នុងប្រឡាយលូទឹកស្អុយផ្អើលបងប្អូនប្រជាពលរដ្ឋ ចោមរោមមើល និងកម្លាំងសមត្ថកិច្ច មូលដ្ឋានចុះមកជួយអន្តរាគមន៏ សំណាងល្អមិនមានអ្នករងរបួស។
ក្រោយពេលកើតហេតុ ដោយសមត្ថកិច្ចមើលឃើញថា មិនបង្កគ្រោះថ្នាក់ដល់អ្នកដ៏ទៃនិងសម្បត្តិសាធារណៈរបស់រដ្ឋក៏បានឲ្យម្ចាស់ ស្ទូចរថយន្តយកទៅជួសជុលដោយខ្លួនឯង៕
