នគរបាលខណ្ឌដង្កោចុះល្បាតប្រទះឃើញរថយន្តមួយគ្រឿងប្លុងចោល ស្ទួចមកទុកស្រាវជ្រាវរកម្ចាស់
ភ្នំពេញ៖ កម្លាំងនគរបាលខណ្ឌដង្កោបានប្រទះឃើញរថយន្តមួយគ្រឿងម៉ាក CHEVROLET MALIBO ពណ៌ស ស្លាកលេខ ភ្នំពេញ2AU-3236 សង្ស័យគេប្លុងចោល
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២និង១០នាទីថ្ងៃត្រង់ថ្ងៃទី១៥ខែវិច្ឆិកាឆ្នាំ២០១៩ នៅចំណុចភូមិស្រែញ សង្កាត់ពងទឹក ខណ្ឌដង្កោ រាជធានីភ្នំពេញ ។
សមត្ថកិច្ចបានអោយដឹងថា មុនពេលកើតហេតុ កម្លាំងនគរបាល អន្តរាគមន៍ នៃអធិការដ្ឋាននគរបាលខណ្ឌដង្កោ ដែលដឹកនាំដោយលោកវរសេនីយ៍ឯក ជឹម ស៉ីថា អធិការនគរបាលខណ្ឌដង្កោ ចុះល្បាតក្នុងភូមិសាស្រ្ដខណ្ឌដង្កោ បានប្រទះឃើញរថយន្ដមួយគ្រឿងម៉ាក CHEVROLET MALIBO សេរី ឆ្នាំ២០១៧ មួយគ្រឿងចតចោល ដោយមានការសង្ស័យកម្លាំងសមត្ថកិច្ចត្រួតពិនិត្យនិងបានស្ទួចយកមករក្សាទុកដើម្បី ធ្វើការស្រាវជ្រាវរកម្ចាស់ ។
សមត្ថកិច្ចបន្តថា បើតាមប្រភពពីប្រជាពលរដ្ឋបានឲ្យដឹងថា នៅវេលាម៉ោង២ រំលងអាធ្រាត្រគាត់បានឃើញជនជាតិចិន២-៣នាក់បានជិះរថយន្ដម៉ាកខាងលើ មកឈប់នៅចំណុចកើតហេតុ ហើយមិនដឹងយ៉ាងមិចស្រាប់តែទុករថយន្តចោលទៅបាត់ ។
បច្ចុប្បន្នរថយន្តខាងលើត្រូវបានកម្លាំងសមត្ថកិច្ច ស្ទូចយកមករក្សាទុកនៅអធិការដ្ឋាននគរបាលខណ្ឌដង្កោ រងចាំម្ចាស់យក ឯកសារមកពិនិត្យអោយទទួលយកទៅវិញ ៕
