ចោរឆក់កាបូបជនជាតិចិនបានសម្រេច សមត្ថកិច្ច មិនដឹង សង្ស័យមេប៉ុស្តិ៍ដេកលក់ភ្លេចដឹកនាំកម្លាំងល្បាត
ភ្នំពេញ៖ ជនជាតិចិន២នាក់ប្ដីប្រពន្ធជិះម៉ូតូឌុបមកពីទិញសាច់ជ្រូក ត្រូវចោរមួយក្រុមជិះម៉ូតូចំនួន៣គ្រឿងមិនចាំម៉ាក ធ្វើសកម្មភាពឆក់កាបូប បានសម្រេច រួចនាំគ្នាជិះគេចខ្លួនបាត់ដោយសុវត្តិភាព មិនរំខាន់ដល់សមត្ថកិច្ច
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៤ទៀបភ្លឺ ថ្ងៃទី១៦ខែវិច្ឆិកា ឆ្នាំ២០១៩ នៅត្រង់ចំណុចគល់ស្ពានអាកាសផ្សារដីហុយខាងលិច តាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
ជនរងគ្រោះប្រុសស្រីទាំង២នាក់មិនត្រូវបានស្គាល់អត្តសញ្ញាណនោះទេ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញ ជនជាតិចិន ប្រុសស្រី២នាក់ជិះម៉ូតូមួយគ្រឿងម៉ាក ធូដេ ពណ៌ក្រហម ពាក់ស្លាកលេខភ្នំពេញ1HD-9073ធ្វើដំណើរតាមបណ្ដោយ ផ្លូវសហព័ន្ធរុស្ស៊ី ទិសដៅពីកើតទៅលិច ដោយមានសាច់ជ្រូកមួយស្បោងនៅនិងម៉ូតូ ខណៈជិះមកដល់ត្រង់ចំណុចកើតហេតុខាងលើស្រាប់តែមានជនសង្ស័យមួយក្រុមជិះម៉ូតូ ៣គ្រឿងមកពីក្រោយរួចបានធ្វើសកម្មភាពឆក់កាបូបពីស្ត្រី ដែលអង្គុយនៅខាងក្រោយបានសម្រេច បណ្ដាលឲ្យជនរងគ្រោះដួលម៉ូតូរបួសទាំង២នាក់ ចំណែកក្រុមជនសង្ស័យ ជិះម៉ូតូគេចខ្លួនបាត់ស្រមោល ។
បន្ទាប់ពីកើតហេតុភ្លាមៗជនរងគ្រោះត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យ ព្រមទាំងលើកម៉ូតូជនរងគ្រោះទៅជាមួយផងដែរ ។
ក្រោយពេលកើតហេតុទើបគេឃើញកម្លាំងសមត្ថកិច្ច មូលដ្ឋាន ចុះមកដល់និងបានសួរនាំគេឯងនៅកន្លែងកើតហេតុ ខណៈដែលជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យបាត់អស់ហើយ៕
