ចាំមើលម្ចាស់រថយន្ត570ស្លាកលេខភ្នំពេញ2AN-1188ចូលខ្លួនដោះស្រាយឬទេ?
ភ្នំពេញ ៖ រថយន្ត ហាយឡែនឌ័រ មួយគ្រឿងក្រឡាប់ផ្ងារជើងម្ខាង ខូចខាតយ៉ាងដំណំ រីឯអ្នកបើកបរនិងអ្នករួមដំណើររងរបួសស្រាល បន្ទាប់ពីរថយន្តម៉ាកឡិចសុីសLX570 បើកបុកចំពីចំហៀងខាងក្រោយពេញទំហឹង
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៣ និង០៥នាទីរំលងអាធាត្រ ចូលថ្ងៃទី២០ខែវិច្ឆិកាឆ្នាំ២០១៩ នៅចំណុចមាត់ប្រឡាយលូទឹកស្អុយបឹងត្របែក តាមបណ្ដោយផ្លូវ១០៥កែងនិងផ្លូវ៤៣២ ក្នុងសង្កាត់បឹងត្របែក ខណ្ឌចំការមន ។
តាមសម្ដីបុរសជាតៃកុងរថយន្តរងគ្រោះបានប្រាប់ឲ្យដឹងថា រូបគាត់និងមិត្តភក្ភ័ម្នាក់ទៀតរួមដំណើរជាមួយគ្នា បានបើករថយន្តម៉ាកហាយឡែនឌ័រ ពណ៌ខៀវ ពាក់ស្លាកលេខ ភ្នំពេញ 2BD-3208 តាមបណ្ដោយផ្លូវ១០៥ ទិសដៅពីត្បូងទៅជើងក្នុងល្បឿនល្មម លុះមកដល់ចំណុចកើតហេតុ បានបើកឆ្លងផ្លូវជិតផុតហើយ ស្រាប់តែមានរថយន្ត បង្កស៊េរីទំនើប ម៉ាកឡិចសុីសLX570 ពណ៌ស ពាក់ស្លាកលេខ ភ្នំពេញ 2AN-1188 ធ្វើដំណើរតាមបណ្ដោយផ្លូវ៤៣២ ទិសដៅពីលិចទៅកើតក្នុងល្បឿនយ៉ាងលឿន មកបុកចំកន្ទុយចំហៀងរថយន្ត របស់គាត់វិលជិត៣ជុំ ជ្រុលទៅបុករបាំងថ្មដែលគេដាក់ឃាំងលូទឹកស្អុយ ក្រឡាប់ផ្ងារជើងម្ខាង រងការខូចខាតយ៉ាងដំណំ សំណងល្អ មិនបណ្ដាលឲ្យគាត់និងអ្នករួមដំណើររងរបួសធ្ងន់ធ្ងរ នោះទេ ។
អ្នកបើកបររថយន្តរងគ្រោះបានបន្តថា បន្ទាប់ពីកើតហេតុភ្លាមៗ រថយន្តបង្កម៉ាកឡិចសុីស570 បានបើកគេចបាត់ស្រមោល បន្សល់ទុកនៅស្លាកលេខភ្នំពេញ 2AN-1188 ។
ក្រោយពេលកើតហេតុសមត្ថកិច្ចមូលដ្ឋានបានចុះមកវាស់វែងយករថយន្តរងគ្រោះទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំស្រាវជ្រាវរករថយន្តបង្កឲ្យមកដោះស្រាយគ្នាតាមផ្លូវច្បាប់ ៕
