ម្ដាយយំស្ទើគាំងបេះដូង!ពេលឃើញកូនស្រីជាទីស្រលាញ់ត្រូវរថយន្តក្រឡុកស៊ីម៉ង់ត៍ក្រឡាប់សង្កត់បែកក្បាលស្លាប់គួរឲ្យសង្វេក
ភ្នំពេញ៖ អាសូរក្មេងស្រីអាយុ៤ឆ្នាំម្នាក់ត្រូវរថយន្តក្រឡុក របស់ក្រុមហ៊ុន ថៃហ្គ័រខនស្ត្រាក់សិន បើកបរលឿនខ្វះការប្រុងប្រយត្ន័ រេចង្កូតរអិលក្រឡាប់ចូលផ្ទះប្រជាពលរដ្ឋនិងសង្កត់ក្មេងស្រីរងគ្រោះបែកក្បាលស្លាប់គួរឲ្យរន្ធត់ រួចរថយន្តបង្កឆាបឆេះយ៉ាងសន្ធោសន្ធៅ
ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលយ៉ាងខ្លាំងកាលពីវេលាម៉ោង០១និង៣០នាទីរសៀលថ្ងៃទី២១ខែវិច្ឆិកាឆ្នាំ២០១៩ នៅចំណុចភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តក្រឡុកស៊ីម៉ង់ត៍របស់ក្រុមហ៊ុន ថៃហ្គ័រខនស្ត្រាក់សិន មួយគ្រឿង ពាក់ស្លាកលេខភ្នំពេញ5A-1448 បើកបរដោយបុរសម្នាក់ ធ្វើដំណើរតាមបណ្ដោយផ្លូវ៥០ម៉ែត្រទិសដៅពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុរថយន្តក៏បានរេចង្កូតមកខាងស្ដាំដៃក្រឡាប់ទៅលើផ្ទះរបស់បងប្អូនប្រជាពលរដ្ឋ និងបានសង្កត់ចំក្មេងស្រីម្នាក់ដែលកំពុងតែអង្គុយនៅលើចិញ្ចើមផ្លូវបណ្ដាលឲ្យស្លាប់បាត់បង់ជីវិតយ៉ាងអាណោចអាធម៌ ។
ប្រភពបានបន្តថា ភ្លាមៗនោះរថយន្តបង្កបានឆាបឆេះជាអណ្ដាតភ្លើងយ៉ាងសន្ធោសន្ធៅ ធ្វើអោយមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ច បានចេញរថយន្តអគ្គីភ័យទៅអន្តរាគមន៍ជួយបាញ់ពន្លត់ ។ ដោយឡែកអ្នកបើកបរត្រូវប្រជាពលរដ្ឋនាំគ្នាចាប់ប្រគល់ឲ្យសមត្ថកិច្ចយកទៅសួរនាំនៅប៉ុស្តិ៍នគរបាល ។
សមត្ថកិច្ចបានអោយដឹងថា សពក្មេងស្រី រងគ្រោះខាងលើមានឈ្មោះ វន សុវាតា អាយុ៤ឆ្នាំ ស្នាក់នៅចំណុចកើតហេតុ មានស្រុកកំណើត ភូមិពោនសិច ឃុំជាន ស្រុកកំចាយមារ ខេត្តព្រៃវែង ។
ក្រោយពេលកើតហេតុគេឃើញមានសមត្ថកិច្ចមូលដ្ឋាននិងសមត្ថកិច្ចជំនាញចរាចរណ៍បានចុះទៅដល់ទីតាំងកើតហេតុដើម្បីធ្វើការវាស់វែងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ និងបាននាំខ្លួនតៃកុង ទៅកសាងសំណុំរឿងចាត់ការបន្តតាមផ្លូវច្បាប់ ។
ចំណែកសពក្មេងស្រី សមត្ថកិច្ចបាបធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
