ជនជាតិចិន ព្រួតគ្នាវាយនារីខ្មែរម្នាក់ដែលជាមេការKTVជិនជន ដូចគ្នា
ភ្នំពេញ៖ នារីម្នាក់ដែលជាមេការនៅក្នុងKTVជិនជន រួមនិងសង្សារ ត្រូវបានក្រុមជនជាតិចិន ដែលជាមេក្នុងKTV ដូចគ្នាព្រួតវាយ និងធាក់ចេញពីKTV បង្កឲ្យមានការភ្ញាក់ផ្អើលយ៉ាងខ្លាំង ហើយត្រូវបានប្រជាពលរដ្ឋជួយអន្តរាគមន៍ ចាប់បំបែក
ហេតុការណ៍នេះកើតឡើងកាលពីវេលាម៉ោង០១និង៣០នាទីរំលងអាធ្រាត្រ ឈានចូលថ្ងៃទី២៨ខែវិច្ឆិកាឆ្នាំ២០១៩ នៅក្នុងKTVជិនជន ស្ថិតនៅតាមបណ្ដោយផ្លូវសហព័ន្ធរុស្សុី ក្បែរព្រលាន្តយន្តហោះពោធិ៍ជិនតុង ក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះ២នាក់គូរសង្សា ខាងលើមិនត្រូវបានស្គាល់អត្តសញ្ញាណនោះទេគ្រាន់តែដឹងថា ខាងស្រីជាមេការក្នុងKTVជិនជន ។ ចំណែកអ្នកបង្កជាជនជាតិចិនមានគ្នា៣ទៅ៤នាក់ ដែលជាមេការក្នុងKTVជិនជនដូចគ្នា ។
បើតាមសម្ដីនារីរងគ្រោះបានឲ្យដឹងថា មុនកើតហេតុ ខ្លួនបានចូលធ្វើការដូចសព្វដង ខណៈពេលកើតហេតុ ក៏មានទំនាស់ពាក្យសម្ដីជាមួយមេការចិនរឿង បុគ្គលិកប្រុស តែតែងខ្លួនជាស្រីមកធ្វើការបម្រើភ្ញៀវ ។ បន្ទាប់មកក៏មានការឈ្លោះប្រកែកគ្នារហូតមានភាគីខាងជនជាតិចិន៣ទៅ៤នាក់បានអូសនារីរងគ្រោះចេញមកក្រៅក៏ទះ២ទៅ៣កំភ្លៀង ទើបធ្វើឲ្យបុរសម្នាក់ជាសង្សារខាងនារីរងគ្រោះស្ទុះទៅជួយ និងវាយតបគ្នាទៅវិញទៅមកមួយសន្ទុះ រហូតមានបងប្អូនប្រជាពលរដ្ឋជួយអន្តរាគមន៍ចាប់បំបែកពីគ្នា ។
ក្រោយមកនារីរងគ្រោះមិនអស់ចិត្ត ព្រោះភាគីខាងជនជាតិចិនព្រួតវាយធ្វើបាបខ្លួននាងនិងសង្សារ ទើបរូបនាងបាននាំគ្នាជិះម៉ូតូទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលចោមចៅ៣ ដើម្បីឲ្យសមត្ថកិច្ចជួយអន្តរាគមន៍រកយុត្តិធម៌ ៕
