បើកម៉ូតូកង់បីឥណ្ឌាឆ្លងផ្លូវត្រូវរថយន្តដឹកគ្រឿងសង្ហារឹមបុករងរបួសធ្ងន់ពីរនាក់

ភ្នំពេញ៖ បុរសម្នាក់បើកម៉ូតូកង់បីឥណ្ឌាមួយគ្រឿងដឹកភ្ញៀវ​ បើកឆ្លងផ្លូវមិនប្រយ័ត្នត្រូវរថយន្តហុីយ៉ាន់ដាយដឹកគ្រឿងសង្ហារឹមបុក​ពេញទំហឹងបណ្តាលឲ្យរងរបួសធ្ងន់ពីរនាក់
ហេតុការណ៍នេះបានកើតឡើងកាលពីវេលា​ម៉ោង៣ទៀបភ្លឺចូលថ្ងៃទី២៩ខែវិច្ឆិកាឆ្នាំ២០១៩ នៅចំណុចស្តុបផ្សារដីហុយ តាមបណ្ដោយផ្លូវភ្នំពេញហាណូយ កែងនឹងផ្លូវ ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ​បានឲ្យដឹងថា មុនពេលកើតហេតុគេឃើញម៉ូតូកង់បីឥណ្ឌាមួយគ្រឿងពណ៌សពាក់​ស្លាក​លេខភ្នំពេញ1IA-1867បើកបរដោយ​បុរស​ម្នាក់និងដឹកបុរសជាភ្ញៀវម្នាក់ទៀតដោយធ្វើដំណើរ​តាមបណ្ដោយផ្លូវភ្នំពេញហាណូយ ទិសដៅពីជើងទៅត្បូង លុះមកដល់ចំណុចកើតហេតុខាងលើបានបត់ឆ្វេងដៃឆ្លងមកផ្លូវ​១៩៨៦ ខណៈកំពុងក៏មានរថយន្តមួយគ្រឿងម៉ាកហ៊ីយ៉ាន់ដាយ​ ពណ៌បៃតងចាស់ ពាក់​ស្លាកលេខភ្នំពេញ3B-4831​ ដឹកគ្រឿងសង្ហារឹម​ បើកបរដោយបុរសម្នាក់រួមដំណើរជាមួយបុរសម្នាក់​ទៀត​ ដោយធ្វើដំណើរ​បញ្ច្រាសទិសគ្នាពីត្បូងទៅជើងក្នុងល្បឿនលឿន​ លុះមកដល់កន្លែងកើតហេតុជាន់ហ្វ្រាំងមិនទាន់ជ្រុលទៅបុកម៉ូតូកង់បីឥណ្ឌាចំពាក់កណ្ដាលពេញទំហឹងបណ្ដាលឲ្យបុរសម្នាក់ជាភ្ញៀវខ្ទាតចេញពីកង់បីប្រហែលជាង១០ម៉ែត្រទៅនឹងចិញ្ចើមផ្លូវរងរបួសធ្ងន់ ចំណែកម្ចាស់កង់បីក៏រងរបួសធ្ងន់ដូចគ្នា​ ភ្លាមៗត្រូវបានរថយន្តសាមុយដឹកយកទៅ​សង្គ្រោះ​បន្ទាន់នៅមន្ទីរពេទ្យទាំងពីរនាក់​ ។ ចំណែករថយន្តបង្កព្យាយាមបើករត់គេចបាន​ប្រហែល ៣០០ម៉ែត្រត្រូវប្រជាពលរដ្ឋដេញតាមចាប់បានទាំងអ្នកបើកបរនិងរថយន្តប្រគល់ឲ្យសមត្ថកិច្ច​ ។

ក្រោយពេលកើតហេតុ សមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមក​វាស់វែងយករថយន្តបង្កនិងម៉ូតូកង់បីទៅរក្សាទុកនៅការិយាល័យចរាចរផ្លូវគោករាជធានីភ្នំពេញរងចាំដោះស្រាយគ្នាទៅតាមផ្លូវច្បាប់នៅពេលក្រោយ​ ៕