អាសូរ! ក្មេងប្រុសអាយុ៣ឆ្នាំម្នាក់ត្រូវរាន្តទេវតា ធ្លាក់សង្កត់ស្លាប់យ៉ាងអាណោចអធម៌
ភ្នំពេញ ៖ គួរឲ្យសង្វេគខ្លាំងណាស់ ដែលក្មេងប្រុសម្នាក់អាយុទើបតែ៣ឆ្នាំបានតោងរាន្តទេតាដែលដាក់នៅមុខផ្ទះ បណ្ដាលឲ្យបាក់សង្កត់ពីលើស្លាប់ពេលបញ្ចូនទៅដល់មន្ទីពេទ្យគុន្ធាបុប្ឋា
ហេតុការណ៍ភ្ញាក់ផ្អើលគួរឲ្យសង្វេកនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី៣០ ខែវិច្ឆិកា ឆ្នាំ២០១៩ ក្បែរសាលាកសិកម្មចំការដូង ស្ថិតក្នុងភូមិខ្វា សង្កាត់ដង្កោ ខណ្ឌដង្កោ ។
សពក្មេងប្រុសមានឈ្មោះ អឿន ចេស្ដា អាយុ៣ឆ្នាំ នៅផ្ទះជាមួយឪពុកម្ដាយ ត្រង់ចំណុចកើតហេតុខាងលើ ។
តាមប្រភពព័ត៌មានពីប្រជាពលរដ្ឋដែលនៅជិតខាងបានប្រាប់ឲ្យដឹងថា នៅថ្ងៃកើតហេតុ ឪពុកម្ដាយក្មេងប្រុសរងគ្រោះបានចេញទៅធ្វើការបាត់អស់ ដោយឲ្យក្មេងប្រុសនៅជាមួយជីតា តែជីតាមិនបានប្រយត្ន័។
ប្រពភបានបន្តថា ខណៈដែលក្មេងប្រុសរងគ្រោះនៅជាមួយជីតានោះ គេបានដើរទៅតោងរាន្តទេវតា ដែលនៅមុខផ្ទះ បណ្ដាលអោយបាក់ធ្លាក់សង្កត់ រងរបួសធ្ងន់ ហើយភ្លាមៗនោះអ្នកជិតខាងបានទាក់ទងទៅឪពុកម្ដាយក្មេងប្រុសរងគ្រោះ និងបញ្ចូនទៅកាន់មន្ទីពេទ្យគុន្ធាបុប្ផា ដើម្បីឲ្យក្រុមគ្រូពេទ្យជួយសង្គ្រោះ តែជាអកុសលក្មេងប្រុសរងគ្រោះខាងលើបានស្លាប់បាត់បង់ជីវិតទៅហើយ រួចក៏បានបញ្ចូនមកផ្ទះវិញ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ រួចធ្វើកំណត់ហេតុ រួចឲ្យឪពុកម្ដាយ និងសាច់ញាតិធ្វើបុណ្យតាមប្រពៃណី ។
សូមបញ្ជាក់ថា ករណីនេះមិនមែនទើបតែកើតមានមួយលើកនេះទេ! គឺតែងតែកើតមាន ដូច្នេះសូមឪពុកម្ដាយគ្រប់រូបទាំងអស់មេត្តាមានការប្រុងប្រយត្ន័អោយបានខ្ពស់ចំពោះកូនតូចៗ ។ បំណងល្អពីគេហទំព័រកោះប៉ែន
