ជនជាតិចិនម្នាក់ត្រូវសមត្ថកិច្ចចាប់វាយខ្នោះបន្ទាប់ពីស្រវឹងស្រាបើករថយន្តបុកម៉ូតូកង់បីរួចបើករត់
ភ្នំពេញ៖ បុរសជនជាតិចិនម្នាក់ស្រវឹងស្រាឡើងទន់ខ្លួនបើករថយន្តស៊េរីទំនើប មួយគ្រឿងយ៉ាងលឿនមិនប្រយត្ន័ជ្រុលទៅបុកម៉ូតូកង់បីឥណ្ឌាពីក្រោយ ក្រឡាប់ជើងម្ខាង បណ្ដាលឲ្យអ្នកបើកបររងរបួសជើង រួចព្យាយាមបើករត់គេច ត្រូវបានបងប្អូនប្រជាពលរដ្ឋនិងកម្លាំងសមត្ថកិច្ចខណ្ឌសែនសុខដេញឃាត់បានទាំងរថយន្តនិងអ្នកបើកបររួចចាប់វាយខ្នោះ
ហេតុការណ៍គ្រោះថ្នាក់ចរាចរណ៍បង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង១១និង២០នាទីយប់ថ្ងៃទី ១៧ខែធ្នូឆ្នាំ ២០១៩ នៅក្នុងបុរីអេវូដ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
បើតាមការរៀបរាប់ពីជនរងគ្រោះបានឲ្យដឹងថា មុនកើតហេតុរូបគាត់បានបើកម៉ូតូកង់បីឥណ្ឌាមួយគ្រឿងពណ៌ស ពាក់ស្លាកលេខភ្នំពេញ1HX-4739 ធ្វើដំណើរតាមបណ្ដោយផ្លូវហព័ន្ធរុស្ស៊ី លុះមកដល់ចំណុចចុងស្ពានអាកាសផ្សាដីហុយ ផ្នែកខាងលិច ស្រាប់តែមានរថយន្តស៊េរីទំនើបមួយគ្រឿងម៉ាក ផច ពណ៌សពាក់ស្លាកលេខភ្នំពេញ2AL-8595 បើកបរដោយបុរសជនជាតិចិនម្នាក់ក្នុងស្ថានភាពស្រវឹងឡើងទាន់ខ្លួនធ្វើដំណើរមកពីក្រោយបុកកង់បីគាត់ពេញទំហឹងបណ្តាលឲ្យក្រឡាប់ផ្ងារជើងម្ខាងចំណែករូបគាត់រងរបួសជើងខាងស្ដាំ ។ ភ្លាមៗនោះរថយន្តបង្កមិនបានឈប់នោះទេ បែជាព្យាយាមបើករត់គេចចេញពីកន្លែងកើតហេតុដោយមិនទទួលខុសត្រូវ។ ខណះនោះដែលប្រជាពលរដ្ឋដែលឃើញហេតុការណ៍ក៏បានរាយការណ៍ជូនសមត្ថកិច្ចកិច្ចបាននាំគ្នាជិះដេញរហូតចូលមកក្នុងបូរីអេវូដត្រូវបានសមត្ថកិច្ចចាប់បានទាំងរថយន្តនិងអ្នកបើកបរស្រាប់តែភាគីបង្កបំរុងផ្ទុះហិង្សាដាក់សមត្ថកិច្ចទើបសមត្ថកិច្ចសម្រេចចាប់វាយខ្នោះ ។ ក្រោយកើតហេតុសមត្ថកិច្ចបានឲ្យភាគីទាំងសងខាងធ្វើការសម្របសម្រួលគ្នាដោយខាងភាគីបង្កបានចេញសំណងទៅឲ្យភាគីរងគ្រោះចំនួន ៥០០ដុល្លារដើម្បីបញ្ចប់រឿង៕
