រថយន្តស្លាកលេខរដ្ឋបើកបុករបាំងថ្មចែកផ្លូវមុខស្ថានទូតជប៉ុន ខូចខាតយ៉ាងដំណំ
ភ្នំពេញ៖ បុរសម្នាក់សង្ស័យស្រវឹងស្រាបើករថយន្តខ្វះការប្រុងប្រយត្ន័៣ជ្រុលចង្កូតទៅបុករបាំងថ្ម ចែកទ្រូងផ្លូវរងការខូចខាតផ្នែកខាងមុខយ៉ាងដំណំ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៩និង១០នាទីយប់ថ្ងៃទី២៥ខែ ធ្នូឆ្នាំ២០១៩ នៅចំណុចមុខស្ថានទូតជប៉ុន តាមបណ្ដោយផ្លូវព្រះនរោត្តម ក្នុងសង្កាត់ទន្លេបាសាក់ខណ្ឌចំការមន រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្ត មួយគ្រឿង ពណ៌ខ្មៅពាក់ស្លាកលេខ រដ្ឋ25-2-0617 បើកបរដោយបុរសម្នាក់ សង្ស័យស្រវឹងស្រា ដោយធ្វើដំណើរតាមបណ្ដោយផ្លូវព្រះនរោត្តម ទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុក៏បានគេចពីម៉ូតូមួយគ្រឿងជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យខូចខាតផ្នែកខាងមុខយ៉ាងដំណំ តែសំណាងល្អដែលមិនបណ្តាលឲ្យមានអ្នករងរបួស។
ប្រភពដដែលបានបន្តថា ភ្លាមៗអ្នកបើកបរបានគេចខ្លួនបាត់ស្រមោល។ ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ រួចទាក់ទងទៅខាងជំនាញចរាចរណ៍មកវ៉ាស់វែងយករថយន្តបង្កទៅរក្សាទុកនៅការិយាល័យចរាចរណ៍ រាជធានីភ្នំពេញ រង់ចាំម្ចាស់ចូលខ្លួនដោះស្រាយតាមច្បាប់នៅពេលក្រោយ៕
