ព្រៃផ្សៃណាស់! បាញ់សម្លាប់មនុស្សដូចបាញ់សត្វ
ភ្នំពេញ៖ បុរសម្នាក់ត្រូវជនសង្ស័យជាខ្មាន់កាំភ្លើងបាញ់១គ្រាប់ស្លាប់យ៉ាងអាណោចអធម៌ នៅលើតុ ក្នុងហាងផឹកស៊ី មួយកន្លែង យីហោ ហេបភីណេស ស៊ុប និងខារ៉ាអូខេគ្រួសារ
ហេតុការណ៍បង្កអោយមានការភ្ញាក់ផ្អើលយ៉ាងខ្លាំងនេះបានកើតឡើងកាលពីវេលាម៉ោងប្រហែល៥ទៀបភ្លឺ ថ្ងៃទី០៩ខែមករាឆ្នាំ២០២០ នៅតាមបណ្តោយផ្លូវលេខ៦៣(ត្រសក់ផ្អែម) ស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។
យោងតាមបុគ្គលិកដែលបំរើការងារនៅក្នុងកើតហេតុ បានអោយដឹងថា មុនពេលកើតហេតុគេបានឃើញ បុរសរងគ្រោះរួមនិងបុរសម្នាក់ទៀតដែលជាជនសង្ស័យបានជិះ រថយន្តមួយគ្រឿងម៉ាក Camryបាឡែន មកជាមួយគ្នា ឈប់នៅមុខហាង ហើយជនរងគ្រោះបានដើរចូលក្នុងហាងមកអង្គុយតុមុនចំណែកជនសង្ស័យជាខ្មាន់កាំភ្លើងនៅខាងក្រៅ រកកន្លែងចតរថយន្ត លុះចតរថយន្តរួចហើយជនដៃដល់បានដើរចូលក្នុងហា រួចបានដកកាំភ្លើងខ្លី បាញ់ផ្អឹបសៀតផ្កាជនរងគ្រោះ១គ្រាប់ បណ្តាលឲ្យអង្គុយស្លាប់លើតុគួរឲ្យសង្វេក។
ប្រភពបន្តថា ជនសង្ស័យបន្ទាប់ពីធ្វើសកម្មភាពបាញ់ជនរងគ្រោះរួច ក៏បានដើរចេញពីក្នុងហាង ដោយមានបុរស២នាក់ផ្សេងទៀត ជិះម៉ូតូ១គ្រឿងមិនចាំម៉ាកមកទទួលគេចខ្លួនបាត់ស្រមោល ។
សពជនរងគ្រោះមិនទាន់ស្គាល់អត្តសញ្ញាណនៅឡើយទេ ដោយរង់ចាំមន្ត្រីជំនាញធ្វើកោសល្យវិច្ច័យសិន ។
ជុំវិញករណីបាញ់ប្រហារផ្ដាច់ជីវិតមនុស្សដ៏សាហាវ នៅកណ្ដាលក្រុងនេះសមត្ថកិច្ចនៅមិនទាន់អាចបញ្ជាក់បានថាផ្តើមចេញពីរឿងអ្វីអោយច្បាស់នៅឡើយទេ! ពេលកម្លាំងសមត្ថកិច្ច ជំនាញកំពុងធ្វើការស្រាវជ្រាវ ដើម្បីវែកមុខជនដៃដល់ចាប់យកមកផ្ដន្ទាទោសតាមច្បាប់ ៕
