សិស្សសាលា២នាក់ជិះម៉ូតូឌុបគ្នាវ៉ាជែង មិនប្រយត្ន័ជ្រុលទៅបុករថយន្តដឹកសិស្សបណ្ដាលឲ្យស្លាប់ម្នាក់និងម្នាក់ទៀតរបួសធ្ងន់
ភ្នំពេញ៖ យុវតីជាសិស្សសាលា២នាក់ជិះម៉ូតូមួយគ្រឿងវ៉ារថយន្តខាងមុខមិនប្រយត្ន័ជ្រុលទៅបុកគ្នាជាមួយរថយន្តសាំងយ៉ុងដឹកសិស្សដែលបើកបញ្ច្រាស់ទិសគ្នា បណ្ដាលអោយស្លាប់ម្នាក់និងម្នាក់ទៀតរបួសធ្ងន់
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង ២០នាទីថ្ងៃទី១៦ខែមករាឆ្នាំ២០២០ នៅតាមបណ្ដោយផ្លូវជាតិលេខ២ ភូមិព្រែកកំពឹស សង្កាត់ព្រែកកំពឹស ខណ្ឌដង្កោ។
សពជនរងគ្រោះមានឈ្មោះ ចាន់ អេលីសាប៊ែត ភេទស្រីអាយុ ១៥ឆ្នាំស្នាក់នៅភូមិក្រាំងស្វាយសង្កាត់ព្រែកកំពឹសខណ្ឌដង្កោ និងក្មេងស្រីម្នាក់ទៀត ដែលជិះខាងក្រោយរងរបួសធ្ងន់មានឈ្មោះ ចន ហ្គោដាមាល អាយុ ១៤ឆ្នាំស្នាក់នៅជាមួយគ្នា
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញយុវតីសិស្សសាលា២នាក់ជិះម៉ូតូមួយគ្រឿងម៉ាកស្មាស់ ពណ៌ខ្មៅ ពាក់ស្លាកលេខភ្នំពេញ1CV-9295 ជិះឌុបគ្នាធ្វើដំណើរតាមបណ្ដោយផ្លូវជាតិលេខ២ ទិសដៅពីលិចទៅកើត ខណៈមកដល់ចំណុចកើតហេតុបានវ៉ារថយន្តមួយគ្រឿងខាងមុខមិនប្រយត្ន័ជ្រុលទៅបុករថយន្តដឹកសិស្សសាលាមួយគ្រឿងម៉ាកសាំងយ៉ុងពណ៌ស ស្លាកលេខភ្នំពេញ2AK-7543 បើកបរដោយយុវជនម្នាក់ធ្វើដំណើរបញ្រ្ចាសទិសគ្នា បណ្ដាលអោយយុវតីម្នាក់ស្លាប់ភ្លាមៗនិងយុវតីម្នាក់ទៀតរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ជួយសម្រួលចរាចរណ៍ និងទំនាក់ទំនងទៅសមត្ថកិច្ចជំនាញមកវាស់វែងយករថយន្តនិងម៉ូតូជនរងគ្រោះយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការរដ្ឋាននគរបាលរាជធានីភ្នំពេញដើម្បីកសាងសំណុំចាត់ការបន្តតាមច្បាប់។
ចំណែកសពជនរងគ្រោះសមត្ថកិច្ចធ្វើកំណត់ ហេតុប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
