ជនសង្ស័យ២នាក់ធ្វើសកម្មភាព ឆក់កាបូប ពីស្ត្រីម្នាក់មិនបានសម្រេចត្រូវសមត្ថកិច្ច ចាប់វាយខ្នោះ
ភ្នំពេញ៖ កម្លាំងនគរបាលប៉ុស្តិ៍ផ្សារដេប៉ូទី២ នៃអធិការដ្ឋាននគរបាលខណ្ឌទួលគោកបានឃាត់ខ្លួនជនសង្ស័យចំនួន២នាក់ បន្ទាប់ពីធ្វើសកម្មភាព(ឆក់កាបូបយួរ)ពីស្ត្រីចំណាស់ម្នាក់មិនបានសម្រេច បណ្ដាលឲ្យស្ត្រីជារងគ្រោះដួលម៉ូតូរលាត់ដៃជើង
ហេតុការណ៍នេះបានកើតឡើងកាលពីវេលាម៉ោង០៩និង៣០នាទីព្រឹកថ្ងៃទី១៦ខែមករាឆ្នាំ២០២០ នៅចំណុចមុខផ្ទះលេខ០១Bផ្លូវលេខ១៣៨ កែង២១៥Z ក្រុមទី២៤ ភូមិ៩ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ។
សមត្ថកិច្ចបានអោយដឹងថា ជនសង្ស័យទាំង២នាក់ដែលឃាត់ខ្លួនរួមមាន៖ ទី១-ឈ្មោះ យៀន រ៉ាវុធ ហៅ វុធ ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅផ្ទះលេខ៤២ ផ្លូវសុកហុក សង្កាត់អូឫស្សីទី១ ខណ្ឌ៧មករា (ជាអ្នកបើកម៉ូតូជិះធ្វើសកម្មភាព) ។
ទី២-មានឈ្មោះ ឈាក សុវណ្ណរតន: ហៅ រតន: ភេទប្រុស អាយុ១៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ២៧ ផ្លូវសុខហុក សង្កាត់អូរឫស្សីទី១ ខណ្ឌ៧មករា (ជានាក់ធ្វើសកម្មភាពឆក់) ។
ចំណែកជនរងគ្រោះមានឈ្មោះ កែវ សេង ភេទស្រី អាយុ៧១ឆ្នាំ មុខរបរនៅផ្ទះស្នាក់នៅផ្ទះលេខ២០B ផ្លូវលេខ១៣៨ ក្រុមទី៣០ ភូមិ១០ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ។
បច្ចុប្បន្ន ជនសង្ស័យទាំងពីរនាក់ត្រូវបាននគរបាលឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធីច្បាប់៕
