ភ្លៀងខ្យល់បាក់ផ្លាកពុះដីឡូត៍លក់ចំបុរសម្នាក់ស្លាប់
ព្រះសីហនុ៖ ភ្លៀងមួយមេលាយលំនិងខ្យល់បក់បោក យ៉ាងខ្លាំងបណ្ដាលឲ្យផ្លាកប៉ាន់ណូពុះដីឡូត៍លក់នៅក្បែផ្លូវដួលធ្លាក់មកត្រូវបុរសម្នាក់កំពុងជិះម៉ូតូរងរបួស ធ្ងន់ហើយបានស្លាប់បាត់បង់ជីវិតពេលបញ្ជួនទៅដល់មន្ទីរពេទ្យបង្អែកខេត្តព្រះសីហនុ
ហេតុការណ៍គួរឲ្យសង្វេកនេះបានកើតឡើងកាលពី ព្រឹកថ្ងៃទី១៤ខែកក្ដដាឆ្នាំ២០១៨ នៅលើផ្លូវជាតិលេខ៤ត្រង់ចំនុចម្តុំចំណោត អូរត្រាវក្រុងព្រះសីហនុ ។
សពជនរងគ្រោះមានឈ្មោះ មិញ បូរ៉េត ភេទ ប្រុស អាយុ ៥៦ឆ្នាំ មុខរបរកម្មករ រោងចក្រស្រាបៀរអង្គរ មានទីលំនៅភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ ។
បើតាមប្រភពបានឲ្យដឹងថា មុនពេលកើតហេតុជនរង គ្រោះបានជិះម៉ូតូ១គ្រឿងម៉ាក HONDA C125 ពណ៌ ខ្មៅ ពាក់ស្លាកលេខព្រះសីហនុ1-8387 ខណៈនោះក៏មានភ្លៀងនិងខ្យល់បក់បោកធ្វើឲ្យផ្លាកយីហោពុះដី ឡូត៍ លក់ដែលគេដាក់នៅក្បែផ្លូវជាតិលេខ៤ត្រង់ចំនុចកើតហេតុដួលរលំធ្លាក់មកលើបុរសរងគ្រោះបណ្ដាលឲ្យរងរបួសធ្ងន់ធ្ងរ បន្ទាប់ពីកើតហេតុភ្លាមៗ កម្លាំងនគរបាលប៉ុស្តិ៍រដ្ឋបាលសង្កាត់លេខ១ បានហៅរថយន្តសង្គ្រោះដឹកបញ្ជូនជនរងគ្រោះទៅសង្គ្រោះនៅគ្លីនិកមិត្តភាពឃ្លាំងលើ ។
ក្រោយមកដោយឃើញស្ថានភាពរបួសធ្ងន់ធ្ងរពេក ក៏បានបញ្ជូនទៅសង្គ្រោះនៅមន្ទីរ ពេទ្យបង្អែកខេត្តក្រោយមកជាអកុសលបុរសរងគ្រោះ ត្រូវបានស្លាប់នៅក្នុងមន្ទីរពេទ្យនៅវេលាម៉ោង១២និង ៣០នាទីរសៀលថ្ងៃដដែល ៕
