រន្ធត់ណាស់! សិស្សសាលាកោរកុសល្យវិទ្យាស្ថានជាតិអប់រំកាយនិងកីឡារម្នាក់ស្លាប់និងម្នាក់ទៀតរបួសធ្ងន់ខណៈជិះម៉ូតូជួបគ្រោះចរាចរណ៍
ភ្នំពេញ ៖ បុរសម្នាក់បានស្លាប់បាត់បងជីវិតយ៉ាងអាណោចអធម៌ និងម្នាក់ទៀតរងរបួសធ្ងន់ ខណៈជនរងគ្រោះជិះម៉ូតូឌុបគ្នាបើកក្នុងល្បឿនលឿនហើយវាក់និងរថយន្តកុងទីន័របត់ឆ្លងផ្លូវ ជាន់ហ្វ្រាំងបណ្ដាលអោយដួលអូសបោកនិងរថយន្តបែកដើមទ្រូង
គ្រោះថ្នាក់ចរាចរណ៍បានកើតឡើងកាលពីវេលាម៉ោង ១២ រំលងអាធ្រាត្រឈានចូលថ្ងៃទី៣១ ខែមករា ឆ្នាំ ២០២០ នៅចំណុចមុខ បុរីប៉េងហួត តាមដោយផ្លូវ ៥៩៨ ក្នុងសង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ។
ជនរងគ្រោះដែល( ស្លាប់ )មានឈ្មោះ សេង វាសនា ភេទប្រុសអាយុ ៣២ ឆ្នាំ មុខរបរសិស្ស នៅសាលាកោរកុសល្យវិទ្យាស្ថានជាតិអប់រំកាយនិងកីឡារ ស្នាក់នៅសង្កាត់ច្រាំងចំរេះទី១ ខណ្ឌឬស្សីកែវ មានស្រុកកំណើត ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ ។ ចំណែកអ្នករងរបួសធ្ងន់មានឈ្មោះ សៀម សុរ: ភេទប្រុសអាយុ ២១ ឆ្នាំស្នាក់នៅជាមួយគ្នាមុខរបរដូចគ្នា មានស្រុកកំណើត ស្រុកព្រះនេត្រព្រះ ខេត្តបន្ទាយមានជ័យ។
យោងតាមប្រភពព័ត៌មានពីបុរសម្នាក់ជាសន្តិសុខ ដែលនៅយាមក្បែរកន្លែងកើតហេតុបានឲ្យដឹងថា មុនពេលកើតហេតុគេឃើញបុរសពីរនាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ ២០១៧ ពណ៌ខ្មៅ ពាក់ស្លាកលេខពោធិ៍សាត់1G-8899ធ្វើដំណើរតាមបណ្ដោយផ្លូវ ៥៩៨ ទិសដៅពីត្បូងទៅជើងក្នុងល្បឿនលឿន លុះមកដល់ចំណុចកើតហេតុក៏មានរថយន្តកុងតឺន័រមួយគ្រឿងមិនចាំស្លាកលេខបើកបរបញ្រ្ចាសទិសដៅគ្នាពីជើងទៅត្បូងបានបត់ឆ្វេងដៃចូលទៅផ្លូវបេតុងឆ្ពុះទៅទិសខាងកើតបានវាក់ជាន់ហ្វ្រាំងដួលអូសជាច្រើនម៉ែត្រទៅបុកនឹងរថយន្តពេញទំហឹងបណ្ដាលឲ្យស្លាប់ម្នាក់នៅនឹងកន្លែង ។ចំណែកម្នាក់ទៀតរងរបួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗផងដែរ ។
ប្រភពដដែលបានបន្តថា បន្ទាប់ពីកើតហេតុភ្លាមៗរថយន្តកុងតឺន័របានបន្ថែមល្បឿនបើកទៅមុខគេចបាត់ស្រមោល។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូទៅរក្សាទុកបណ្ដោះអាសន្នរងចាំប្រគល់ជូនសាច់ញាតិវិញ។ ចំណែកសពជនរងគ្រោះសមត្ថកិច្ចធ្វើកំណត់ហេតុរួចប្រគល់ជូនសាច់ញាតិយកទៅធ្វើបុណ្យតាមប្រពៃណី៕
