រថយន្ដបែនដឹកដី បុកនិងកិនបុរសម្នាក់ស្លាប់យ៉ាងអាណោចអធម៌នៅផ្លូវ៥០ម៉ែត្រ បង្កការភ័យខ្លាចដល់ពលរដ្ឋដែលធ្វើដំណើរឆ្លងកាត់
ភ្នំពេញ៖ អាសូរបុរសម្នាក់ត្រូវរថយន្តបែនដឹក ដីបុករួចកិនបណ្ដាលឱ្យស្លាប់បាត់បង់ជីវិតភ្លាមៗនៅនឹងកន្លែងគួរឲ្យសង្វេក
ហេតុការណ៍គ្រោះថ្នាក់ចរាចរណ៍ផ្ដាច់យកជីវិតជនរងគ្រោះនេះបានកើតឡើងកាលពីវេលាម៉ោង០៥និង៣០នាទីល្ងាចថ្ងៃទី១០ ខែកុម្ភៈឆ្នាំ២០២០នៅតាមបណ្ដោយផ្លូវ៥០ម៉ែត្រត្រង់ចំណុចភូមិអន្លង់គង់ចាស់ សង្កាត់ព្រៃស ខណ្ឌដង្កោ រាជធានីភ្នំពេញ ។
សពជនរងគ្រោះមានឈ្មោះ ទៀវ សំណាង ភេទប្រុសអាយុ២៥ ឆ្នំមុខរបរ កម្មករសំណង ស្នាក់នៅផ្ទះជួល ភូមិព្រៃព្រីងខាងត្បូង សង្កាត់ចោមចៅទី៣ ខណ្ឌពោធិ៍សែនជ័យ មាន ស្រុកកំណើត ភូមិថ្មី ឃុំចំបក ស្រុកស្វាយជ្រុំ ខេត្ដស្វាយរៀង ។
យោងតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេ បានឃើញបុរសរងគ្រោះជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ ពាក់ស្លាក លេខភ្នំពេញ 1F-4773 បើកម្នាក់ ឯងតាមបណ្ដោយផ្លូវ៥០ម៉ែត្រ ទិសដៅពីត្បូងទៅជើង ខណៈមក ដល់ចំណុចកើតហេតុក៏ត្រូវរថយន្ដបែន ដឹកដីបើកបរស្របទិសគ្នា ក្នុងល្បឿនលឿន លុះមកដល់កន្លែងកើតហេតុបានបត់ស្ដាំមិនប្រយត្ន័ជ្រុលទៅបុកម៉ូតូ ជនរងគ្រោះពីក្រោយបណ្ដាលឲ្យដួលរួចកិនស្លាប់ភ្លាមៗតែម្ដង ។
ប្រភពបន្តថា បន្ទាប់ពីបង្កហេតុភ្លាមៗដឹងថាជនរងគ្រោះ តៃកុងរថយន្ដ បានរត់គេចខ្លួនបាត់ស្រមោលបន្សល់ទុកនៅតែរថយន្ដ។
ក្រោយពេលកើតហេតុសមត្ថកិច្ចជំនាញ ចរាចរណ៍ខណ្ឌដង្កោ បានចុះមករួចទាក់ទងទៅ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ មកធ្វើការវាស់វែងអូសរថយន្ដ និង ម៉ូតូទៅរក្សាទុកដើម្បីកសាងសំណុំរឿងចាត់ការបន្តតាមនិតិវិធីច្បាប់ ។ ចំណែកសពជនរងគ្រោះត្រូវសមត្ថកិច្ចធ្វើកំណត់ ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
មហាជនបានលើកឡើងថា បញ្ហារថយន្តដឹកដី របស់ក្រុមហ៊ុននិយាយដែលបើកឆ្លងកាត់ឬតាមបណ្ដោយផ្លូវ៥០ម៉ែត្រនិង៦០ម៉ែត្រ បើកលឿនៗ ខ្វះការប្រុងប្រយត្ន័ ហើយរថយន្តដឹកដីទាំងនោះខ្លះគ្មានស្លាកលេខនោះទេ មិនតែប៉ុណ្ណោះ តែងតែបង្កគ្រោះដល់អាយុជីវិតប្រជាពលរដ្ឋជាញឹកញាប់ ។
ដូច្នេះហើយប្រជាពលរដ្ឋបានសូមណូមពរយ៉ាងទទួចដល់អាជ្ញាធរ ខណ្ឌដង្កោមេត្តាក្រឡេកមើលក្រុមរថយន្តដឹកដីទាំងនោះផងដើម្បីធានាសុវត្ថិភាពពលរដ្ឋដែលធ្វើដំណើរតាមផ្លូវសារធាណៈរួមគ្នា កុំអោយក្រុម តៃកុង សុីឈ្នួលគេ អាងអីបុកហើយរត់ ទុកអោយអ្នករងគ្រោះវេទនា៕
