ជាងពិដានជនជាតិវៀតណាមម្នាក់ត្រូវចរន្តអគ្គិសនីឆ្លងឆក់ស្លាប់យ៉ាងអាណោចអធម៌
ភ្នំពេញ៖ បុរសជនជាតិវៀតណាម ម្នាក់ត្រូវចរន្តអគ្គិសនីឆ្លងចេញពីម៉ូទ័រឆក់ស្លាប់យ៉ាងអាណោចអធម៌ ៖ បង្កការណ៍ភ្ញាក់ផ្អើលកាលពីវេលាម៉ោង៧និង៣០នាទីព្រឹកថ្ងៃទី១០ ខែមីនា ឆ្នាំ២០២០ នៅក្នុងបុរីអាកាសចរណ៍ ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
សពជនរងគ្រោះមានឈ្មោះ ឡា គឹមសាន ហៅ ឡឺយ អាយុ៣១ឆ្នាំជនជាតិវៀតណាម សញ្ជាតិខ្មែរ មុខរបរជាងពិដាន ស្នាក់នៅផ្ទះលេខ767C ផ្លូវលំ សង្កាត់ ស្វាយប៉ាក ខណ្ឌឫស្សីកែវ រាជធានីភ្នំពេញ។
យោងតាមប្រភពពីបុរសម្នាក់ដែលជាជាងសំណង់ដូចគ្នាបានអោយដឹងថា នៅល្ងាចថ្ងៃទី៩ខែមិនាឆ្នាំ២០២០ ខណៈដែលរូបគាត់និងអ្នករួមការងារផ្សេងទៀត បានឈប់សម្រាកហើយបាននាំគ្នាទៅផ្ទះ នៅតែជនរងគ្រោះ ធ្វើការម្នាក់ឯងមិនទាន់ទៅផ្ទះ ហើយក៏មិនដឹងថាគាត់មានរឿងអ្វីកើតឡើងដែរ។
ប្រភពបន្តថា លុះព្រឹកឡើងម៉ោងជាង៧ព្រឹកថ្ងៃទី១០ ខែមីនា ឆ្នាំ២០២០ ខណៈដែលគាត់មកដល់ការដ្ឋានសំណង់ផ្ទះ កំពុងជួសជុលរួចបានឡើងទៅលើជាន់ទី៣ ស្រាប់តែប្រទះឃើញជនរងគ្រោះដេកអោបម៉ូទ័រក្រឡុកថ្នាំលាបពិដាន ភ្លាមៗខ្លួនបានក៏ចូលទៅមើលទើបដឹងថាជនរងគ្រោះត្រូវចរន្តអគ្គិសនីឆ្លងពីម៉ូទ័រឆក់ស្លាប់ ទើបគាត់ដកឌូយម៉ូទ័រចេញ រួចរត់ចុះក្រោមស្រែកប្រាប់គេឯងបង្កការភ្ញាក់ផ្អើលនិងបានរាយការណ៍ទៅសមត្ថកិច្ចមូលដ្ឋានចុះមកពិនិត្យ ។
សមត្ថកិច្ចបានអោយដឹងថា បន្ទាប់ពីទទួលបានដំណឹងខាងលើ នគរបាលប៉ុស្តិ៍មូលដ្ឋានចុះទៅពិនិត្យជាក់ស្ដែង នៅកន្លែងកើតហេតុនិងទំនាក់ទំនងទៅនគរបាលជំនាញការិយាល័យបច្ចេកទេសវិទ្យាសាស្រ្តនៃស្នងការដ្ឋាននគរបាលរាជធានីភ្នំពេញចុះទៅធ្វើកោសល្យវិច័យ រួចបានសន្និដ្ឋានថាសពជនរងគ្រោះប្រហែលស្លាប់មួយយប់ទៅហើយនិងបានធ្វើកំណត់ហេតុប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
