បុរសម្នាក់ត្រូវនគរបាលចាប់ដាក់ខ្នោះបន្ទាប់ពីយកកាំបិតប៉័ងតោកាប់ប្រពន្ធរបួសធ្ងន់ដេកពេទ្យ
កណ្តាល៖ បុរសចិត្តខ្លាំងម្នាក់ត្រូវសមត្ថកិច្ចចាប់វាយខ្នោះ បន្ទាប់ពីប្រើអំពើហឹង្សាក្នុងគ្រួសារយកកាំបិតកាប់ប្រពន្ធបណ្ដាលឲ្យរបួសធ្ងន់ ៖ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៦និង៣០នាទីល្ងាចថ្ងៃទី២១ខែមិនាឆ្នាំ២០២០នៅចំណុចភូមិសំរោង ឃុំក្រាំងយ៉ូវ ស្រុកស្អាង ខេត្តកណ្ដាល។
-ជនរងគ្រោះមានឈ្មោះ ហ៉ឺន ស្រីវីន ភេទស្រី អាយុ១៩ឆ្នាំជនជាតិខ្មែរ មុខរបរកម្មការិនីរោងចក្រ មានទីលំនៅភូមិសំរោង ឃុំក្រាំងយ៉ូវ ស្រុកស្អាង ខេត្តកណ្ដាល ។
-ចំណែកជនសង្ស័យមានឈ្មោះ យ៉ិន ម៉ៅ ភេទប្រុស អាយុ២៦ឆ្នាំជនជាតិខ្មែរ(ត្រូវជាប្ដី) មុខរបរកម្មកររោងចក្រ ស្នាក់នៅជាមួយគ្នា។
សមត្ថកិច្ចបានឲ្យដឹងថា នៅមុនពេលកេីតហេតុ (ជនសង្ស័យជាប្ដី) បានសួរប្រពន្ធ(ដែលជាជនរងគ្រោះ) រកសោរផ្ទះបន្ទាប់មកអ្នកទាំងពីរក៏បានទាស់ពាក្យសម្ដីជាមួយគ្នារហូតដល់ប្រតាយប្រតប់គ្នាទៅវិញទៅមកពេលនោះ (ជនសង្ស័យ) ខឹងក៏បានយកកាំបិតប៉័ងតោ កាប់ (ជនរងគ្រោះជាប្រពន្ធ ) ចំក្បាលផ្នែកខាងក្រោយមួយកាំបិតនិងចំដៃមួយកាំបិតបណ្ដាលឲ្យរងរបួសធ្ងន់ ភ្លាមៗត្រូវបានសាច់ញាតិបញ្ជូនទៅសង្គ្រោះបន្ទាន់នៅមន្ទីពេទ្យឯរាជធានីភ្នំពេញ ។
បច្ចុប្បន្ន ជនសង្ស័យរួមទាំងវត្ថុតាងត្រូវបានបញ្ជូនទៅកាន់អធិការដ្ឋាននគរបាលស្រុកស្អាងដេីម្បីកសាងសំណុំរឿងចាត់ការបន្តតាមនីតិវិធីច្បាប់៕
