គេវាយយុវជនម្នាក់រហូតស្លាប់នៅក្បែប៉ុស្តិ៍នគរបាលផ្សារថ្មី៣ គ្មានសមត្ថកិច្ច អន្តរាគមន៍ សង្ស័យសំងំដេកមិនហ៊ានចេញព្រោះខ្លាចកូរ៉ូណា
ភ្នំពេញ ៖ យុវជនម្នាក់ត្រូវក្រុមជនសង្ស័យមួយក្រុមជិះម៉ូតូដេញស្ទាក់វាយរហូតស្លាប់យ៉ាងអាណោចអធម៌ នៅក្បែប៉ុស្តិ៍នគរបាលផ្សារថ្មី៣ និងម្នាក់ទៀតបានរងរបួសស្រាល បន្ទាប់ពីផឹកសុីនៅកន្លែងលក់ស្រាក្រឡុក រួចទាស់សម្ដីគ្នា ៖ ហេតុការណ៍ភ្ញាក់ផ្អេីលនេះបានកើតឡើងនៅវេលាម៉ោង០៣និង៣០នាទីទៀបភ្លឺចូលថ្ងៃទី២៣ ខែមីនា ឆ្នាំ២០២០ នៅត្រង់ចំណុច មុខសាលាមត្តេយ្យវត្តកោះ ចម្ងាយប្រហែល៣០ម៉ែត្រ ពីប៉ុស្តិ៍ផ្សារថ្មី៣ តាមបណ្ដោយផ្លូវ៦៣ កែងផ្លូវ១៧៤ ស្ថិតក្នុងសង្កាត់ បឹងរាំង ខណ្ឌដូនពេញ រាជធានីភ្នំពេញ។
ជនរងគ្រោះដែលស្លាប់មានឈ្មោះ តាំង ម៉េងហួត ភេទប្រុស អាយុ២៥ឆ្នាំ មុខរបរធ្វេីការនៅក្នុងហាងអ៉ីនធេីណេត នៅម្ដុំទឹកល្អក់ទី៣ ខណ្ឌទួលគោក ស្នាក់នៅម្ដុំបឹងសាឡាង ខណ្ឌទួលគោក ជាអ្នកជិះម៉ូតូពីក្រោយ ។ ចំណែកអ្នកបើកម៉ូតូមានឈ្មោះ សំ ណាង ភេទប្រុស អាយុ១៨ឆ្នាំ ជនជាតិខ្មែរ មុខរបរធ្វើការ នៅក្នុងហាងអុីនធើណេត ស្នាក់នៅម្តុំផ្សារសំណង់១២ សង្កាត់ទឹកល្អក់ទី៣ ខណ្ឌទួលគោក រងរបួសស្រាល ហើយម៉ូតូដែលជនរងគ្រោះទាំង២នាក់ជីះម៉ាក ហុងដា ឌ្រីមសង់ C125 ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ1BI-8720 ។
បើតាមសម្តីជនរងគ្រោះដែលរបួសស្រាលបានប្រាប់ថា មុនកើតហេតុជនរងគ្រោះដែលស្លាប់ទៅផឹកស៊ីជាមួយមិត្តភ័ក្តរបស់គេនៅកន្លែងលក់ស្រាក្រឡុក ម្ដុំផ្សារសូរិយ៉ាម៉ល ក្នុងខណ្ឌដូនពេញ ខណៈពេលកំពុងផឹកស៊ី ជនរងគ្រោះនិងក្រុមភាគីខាងបង្កបានទាស់សម្ដីគ្នា (តែមិនដឹងមូលហេតុអ្វីនោះទេ) ហេីយបានទូរស័ព្ទប្រាប់អោយខ្លួនជិះម៉ូតូមកយក លុះមកដល់ខ្លួនបានឌុមជនរងគ្រោះ ត្រលប់ទៅផ្ទះវិញ ដោយធ្វេីដំណេីរតាមផ្លូវ៦៣ ទិសដៅពីជើងមកត្បូង ខណៈមកដល់មុខសាលាមត្តេយ្យវត្តកោះ កែងផ្លូវ១៧៤ ចម្ងាយពីស្នាក់ការប៉ុស្តិ៍នគរបាលរដ្ឋបាលផ្សារថ្មីទី៣ ប្រហែល៣០ម៉ែត្រ ស្រាប់តែលេចមុខក្រុមជនសង្ស័យមានគ្នាជាច្រេីននាក់ជិះម៉ូតូ៣គ្រឿងតាមមកពីក្រោយ ប្រដាប់ដោយដុំថ្មនិងឈេីជ្រុងបានជិះបំបុកម៉ូតូដែល រូបគេកំពុងឌុបជនរងគ្រោះ បណ្ដាលឲ្យដួលម៉ូតូសង្កត់លេីជេីង របស់ខ្លួន បណ្ដាលឲ្យរងរបួសស្រាល ឯក្រុមជនបង្ក បានចុះពីលេីម៉ូតូរត់សំដៅទៅរកជនរងគ្រោះរួចធ្វេីសកម្មភាពព្រួតវាយជនរងគ្រោះនិងស្រែកសំឡុតរូបគេមិនឲ្យចូលជួយ បេីហ៊ានតែចូលជួយ ពួកគេនឹងវាយទាំងអស់ ។
ជនរងគ្រោះបន្តថា បន្ទាប់ពីធ្វើសកម្មភាពវាយ បណ្ដាលឲ្យជនងគ្រោះរងរបួសធ្ងន់(ដង្ហើមចង្រិត)រួច ក្រុមជនបង្ក បាននាំគ្នាជិះម៉ូតូគេចខ្លួនបាត់ដោយសុវត្ថិភាព មិនរំខានសមត្ថកិច្ចប៉ុស្តិ៍ផ្សារថ្មី៣ ដែលមានស្នាក់ការនៅជិតកន្លែងកេីតហេតុនោះឡើយ។ក្រោយមករថយន្តសង្រ្គោះបានមកដល់ហើយលើកជនរងគ្រោះដាក់លើរថយន្ត តែអកុសលជនរងគ្រោះបាន ដាច់ខ្យល់ស្លាប់ទៅហើយ ។
ក្រោយពេលកើតហេតុសមត្ថកិច្ចប៉ុស្តិ៏បឹងរាំងបានមកដល់នាំជនរងគ្រោះដែលរងរបួសស្រាលទៅប៉ុស្តិ៏សួរនាំដើម្បីកំណត់មុខសញ្ញានិងតាមចាប់ក្រុមជនសង្ស័យ យកមកផ្តន្ទាទោសតាមផ្លូវច្បាប់។
ចំណែកសពត្រូវបានសមត្ថកិច្ចជំនាញធ្វើកំណត់ហេតុរួចប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
