រន្ធត់ណាស់!! ស្ត្រីចំណាស់ម្នាក់ស្លាប់នៅក្នុងអណ្ដាតភ្លើង និងមនុស្សប្រុសស្រី៥នាក់ទៀតរបួសធ្ងន់ស្រាល
ភ្នំពេញ៖ អាសូរ! ស្ត្រីវ័យ៧១ឆ្នាំម្នាក់បានស្លាប់បាត់បង់ជីវិត យ៉ាងអាណោចអធម៌ នៅក្នុងហេតុការណ៍គ្រោះអគ្គីភ័យឆាបឆេះផ្ទះលក់សាំងនិងហ្គាស ឯមនុស្សប្រុសស្រីចំនួន៥នាក់ទៀតបានរងរបួសធ្ងន់ និង ស្រាល ត្រូវបានគេបញ្ជួនទៅសង្គ្រោះនៅមន្ទីរពេទ្យ
ហេតុការណ៍អគ្គីភ័យគួរអោយរន្ធត់នេះបានកើតឡើងកាលពីវេលាម៉ោង០៥និង១៥នាទីល្ងាចថ្ងៃទី២៥ខែមីនា ឆ្នាំ២០២០ នៅតាមបណ្ដោយផ្លូវលេខ២២១ កែវនិងផ្លូវលេខ ១៤៦ ក្រុមទី២៦B ភូមិ០៧សង្កាត់ផ្សារដេប៉ូទី២ ខណ្ឌទួល គោក រាជធានីភ្នំពេញ។
ស្ត្រីរងគ្រោះដែលស្លាប់មានឈ្មោះ យន ស្រុិប ភេទស្រី អាយុ ៧១ឆ្នាំមុខរបរនៅផ្ទះ។ និងមនុស្សប្រុសស្រីចំនួន៥នាក់ទៀតរបួសធ្ងន់និងស្រាល។
បេីយោងតាមប្រភពព័ត៌មានពីប្រជាពលរដ្ឋដែលរស់នៅក្បែរផ្ទះកើតហេតុបានអោយដឹងថាពេលកើតហេតុគឺដួលដបសាំងប៉ះភ្លើងបណ្ដាលអោយឆាបឆេះជាអណ្ដាតភ្លើងតែម្ដង ភ្លាមៗប្រជាពលរដ្ឋ បានយកបំពង់ពន្លត់អគ្គីភ័យជួយបាញ់ពន្លត់តែមិនអាចគ្រប់គ្រងបាន បន្ទាប់មកកម្លាំងសមត្ថកិច្ចនៃការិយាល័យនគរបាល បង្ការពន្លត់អគ្គីភ័យបានចេញរថយន្តពន្លត់អគ្គីភ័យមកដល់កន្លែងកើតហេតុជួយអន្តរាគមន៍បាញ់ពន្លត់ជាស្ថាពរនៅវេលាម៉ោង០៥និង៥០នាទីល្ងាចថ្ងៃដដែល។
មន្ត្រីនគរបាល ការិយាល័យ បង្ការនិងពន្លត់អគ្គីភ័យបានប្រាប់ឲ្យដឹងថា ក្នុងប្រតិបត្តិការពន្លត់អគ្គីភ័យនេះកម្លាំងនគរបាលបានជំនាញបានប្រើប្រាស់រថយន្តពន្លត់អគ្គីភ័យដើម្បីអន្តរាគមន៍បាញ់ពន្លត់អស់រថយន្តចំនួន១២គ្រឿង ជារថយន្តពន្លត់អគ្គីភ័យរបស់ស្នងការដ្ឋាននគរបាលរាជធានីភ្នំពេញ៕
