រថយន្តស៊េរីទំនើប570 ពាក់ស្លាកលេខភ្នំពេញ2AQ.5555 បើកបុកម៉ូតូណៃហត បណ្ដាលឲ្យបុរសម្នាក់រងរបួសធ្ងន់
ភ្នំពេញ ៖ បុរសម្នាក់បានរងរបួសធ្ងន់ហេីយត្រូវបានរថយន្តសាមុយដឹកបញ្ចូនទៅកាន់មន្ទីពេទ្យភ្លាមៗ ខណៈដែលកំពុងជិះម៉ូតូត្រូវរថយន្តស៊េរីទំនើបមួយគ្រឿងម៉ាកលុចសុីស570បេីកបរយ៉ាងលឿនជ្រុលទៅបុកចំពីចហៀងពេញទំហឹង កាលពីវេលាម៉ោង១០និង៥០នាទីយប់ថ្ងៃទី២៥ ខែមីនា ឆ្នាំ២០២០ ស្ថិតនៅតាមបណ្ដោយផ្លូវលេខ៣១០ កែងនិងផ្លូវលេខ៥១ ក្នុងសង្កាត់បឹងកេង១ ខណ្ឌបឹងកេងកង ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញជនជាតិចិនមួយក្រុមបើករថយន្តស៊េរីទំនើបម៉ាក លុចសុីសLX570ពណ៌ស ពាក់ស្លាកលេខភ្នំពេញ2AQ -5555 ធ្វើដំណើរតាមបណ្ដោយផ្លូវ៣១០ ទិសដៅពីកេីតមកលិចក្នុងល្បឿនលឿន ខណៈមកដល់ចំនុចកើតហេតុខាងលើដោយមិនគោរពស្លាកសញ្ញាឈប់ ក៏ជ្រុលទៅបុកម៉ូតូណៃហត ពណ៌ខ្មៅ ពាក់ស្លាកលេខភ្នំពេញ1AC -9147 ជិះដោយបុរសម្នាក់ធ្វេីដំណេីរតាមបណ្ដោយផ្លូវ៥១ ទិសដៅពីជើងទៅត្បូង ចំពីចហៀងពេញទំហឹង បណ្ដាលបុរសម្នាក់ជាម្ចាស់ម៉ូតូរងរបួសធ្ងន់ រីឯរថយន្តបង្កព្យាយាមបើករត់ប្រមាណជិត១០០ម៉ែត្រទេីបទៅមុខលែងរួច ដោយរថយន្តបង្កបានខូចខាតកាងមួយកំណាត់មុខផងដែរ ។
ក្រោយកេីតហេតុភ្លាមៗ ជនរងគ្រោះត្រូវបានរថយន្តគ្លីនិចឯកជនដឹកយកទៅសង្គ្រោះនៅមន្ទីពេទ្យជោរៃ ក្នុងខណ្ឌច្បារអំពៅផងដែរ ។ បន្ទាប់មកសមត្ថកិច្ចមូលដ្ឋានចុះមកដល់ ហេីយទាក់ទងទៅជំនាញចរាចរណ៍ខណ្ឌបឹងកេងកង ឲ្យមកធ្វេីការវាស់វែងយករថយន្តបង្កនិងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់៕
