ជនសង្ស័យដែលបើករថយន្តពាក់ផ្លាកលេខភ្នំពេញ2BA-9111បុកមនុស្សស្លាប់សមត្ថកិច្ច ចាប់ខ្លួនបានហើយ
ភ្នំពេញ៖ ជនសង្ស័យដែលបានបើករថយន្តម៉ាកTOYOTA ពណ៌ខ្មៅពាក់ផ្លាកលេខភ្នំពេញ2BA-9111 បង្កគ្រោះថ្នាក់ចរាចរណ៍បណ្ដាលអោយជនរងគ្រោះស្លាប់ចំនួន២នាក់ហើយព្យាយាមបើកគេចខ្លួនបានប្រហែល៤ម៉ោង ត្រូវបានសមត្ថកិច្ចខណ្ឌសែនសុខ ធ្វើការស្រាវជ្រាវចាប់ខ្លួនបានកាលពីវេលាម៉ោងប្រហែល ០១និង២០នាទីរំលងអាធ្រាត្រ ឈានចូលថ្ងៃទី៣១ខែមិនា ឆ្នាំ២០២០ ។
សមត្ថកិច្ចអោយដឹងថា ជនសង្ស័យមានឈ្មោះ សេង ចិន្តា ភេទប្រុស អាសយដ្ឋាន ផ្ទះលេខ៩៣អឺ២ ផ្លូវលេខ១៣៤ ភូមិ៦ សង្កាត់មិត្តភាព ខណ្ឌ៧មករា រាជធានីភ្នំពេញ ។
សូមរំលឹកថា កាលពីវេលាម៉ោង០៩និង១០នាទីយប់ថ្ងៃទី៣០ខែមីនា ឆ្នាំ២០២០ មានករណីគ្រោះថ្នាក់ចរាចរណ៍មួយបង្កឡើងដោយរថយន្ត០១គ្រឿង ម៉ាកធុនដ្រា ពណ៍ខ្មៅ ពាក់ផ្លាកលេខភ្នំពេញ 2BA-9111 បានបេីកបុកម៉ូតូ០១គ្រឿង បណ្តាលអោយស្លាប់មនុស្សចំនួន២នាក់ នៅត្រង់ចំណុច មុខផ្ទះលេខ១២៣ ផ្លូវ៥៩ប៉េ ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។ បន្ទាប់ពីបង្កហេតុរួចអ្នកបើកបរមិនបានឈប់ទទួលខុសត្រូវនោះ បែជាព្យាយាមបើករត់ចេញពីកន្លែងកើតហេតុ ។
ក្រោយមកលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានដឹកនាំកម្លាំងនគរបាលធ្វើការ ស្រាវជ្រាវ និងចាប់ឃាត់ខ្លួនជនសង្ស័យយកទៅធ្វើការសាកសួរនៅអធិការខណ្ឌសែនសុខ ដើម្បីកសាងសំណុំរឿងចាត់ការបន្តតាមនិតិវិធី ។
បច្ចុប្បន្នជនសង្ស័យរួចទាំងនិងរថយន្ត ត្រូវបានបញ្ជួនទៅការិយាល័យចរាចរណ៍ផ្លូវគោក រាជធានីភ្នំពេញ អនុវត្តតាមនីតិវិធីច្បាប់ ៕ យោងតាមផេក Facebook ផ្លូវការរបស់ស្នងការនគរបាល រាជធានីភ្នំពេញ។
