នគរបាលឃាត់ខ្លួនជនសង្ស័យម្នាក់ដកហូតថ្នាំញៀននិងកាំភ្លើងខ្លីមួយដើម ឯម្នាក់ទៀតរត់គេចខ្លួនបាត់
ភ្នំពេញ ជនសង្ស័យម្នាក់ត្រូវ កម្លាំងនគរបាល អន្តរាគមន៍ខណ្ឌសែនសុខ ឃាត់ខ្លួនឆែកឆេរកឃើញអាវុធខ្លីមួយដើម រីឯបក្ខពួកគេម្នាក់ទៀតរត់គេចខ្លួនបាត់ស្រមោល
ហេតុការណ៍បង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង១២និង៤០នាទីយប់រំលងអធ្រាត្រឈានចូលថ្ងៃអាទិត្យ ទី៥ខែមេសាឆ្នាំ២០២០ នៅតាមបណ្ដោយផ្លូវ១០០៣ ជិតសាលាអាយយូ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា មុនពេលឃាត់ខ្លួនជនសង្ស័យខាងលើ គឺកម្លំាងនគរបាល អន្តរាគមន៍ខណ្ឌសែនសុខ បានជិះម៉ូតូល្បាតក្នុងមូលដ្ឋានដើម្បីទប់ស្កាត់បទល្មើសផ្សេងៗខណៈកំពុងជិះល្បាតស្រាប់តែប្រទះឃើញជនសង្ស័យ២នាក់ជិះម៉ូតូធំមួយគ្រឿង ពណ័ខ្មៅពាក់ស្លាកលេខភ្នំពេញ1BB-4863ភ្លាមនោះកម្លាំងនគរបាល បានហៅឲ្យឈប់តែជនសង្ស័យទាំង២នាក់មិនបានឈប់នោះទេបែជាព្យាយាមជិះម៉ូតូរត់គេច ឃើញដូច្នេះសមត្ថកិច្ចក៏បានជិះម៉ូតូដេញតាមពីក្រោយរហូតដល់ចំណុចកើតហេតុខាងលើ ក្រុមជនសង្ស័យបានផ្ដួួលម៉ូតូរត់គេចខ្លួនតែត្រូវសមត្ថកិច្ចឃាត់ខ្លួនបានម្នាក់ឆែកឆេរកឃើញថ្នាំញៀនចំនួន២កញ្ចប់និងអាវុធខ្លីមួយដើមរួចបាននាំយកទៅធ្វើការសួរនាំ រីឯបក្ខពួកជនសង្ស័យម្នាក់ទៀតបានរត់គេចខ្លួនបាត់។
បច្ចុប្បន្ន ជនសង្ស័យរួមនិងវត្ថុតាងត្រូវបាននគរបាលប៉ុស្តិ៏ ភ្នំពេញថ្មី ធ្វើការសាកសួរនិងកសាងសំណុំរឿងបញ្ជូនទៅ អធិការដ្ឋានខណ្ឌសែនសុខដើម្បីចាត់ការបន្តតាមនិតិវិធី។ ចំណែកបក្ខពួកជនសង្ស័យម្នាក់ទៀតដែលរត់គេចខ្លួន សមត្ថកិច្ចកំពុងធ្វើការស្រាវជ្រាវតាមចាប់យកមកផ្ដន្ទាទោសតាមច្បាប់៕
