ឆេះពិដានផ្ទះល្វែងបុរី ភ្នំពេញថ្មី ទួលពង្រ ផ្អេីលដល់សមត្ថកិច្ចចុះអន្តរាគមន៍
ភ្នំពេញ ៖ ផ្ទះល្វែងមួយខ្នងនៅបុរី ភ្នំពេញថ្មី ជាប់ផ្លូវទួលពង្រ ក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ត្រូវបានអគ្គីភ័យឆាបឆេះមួយដង្ហេីមចង្រិត បង្កការភ្ញាក់ផ្អេីលដល់ម្ចាស់ផ្ទះ និងប្រជាពលរដ្ឋរាយការណ៍ទៅអាជ្ញាធរមូលដ្ឋានចុះមកជួយអន្តរាគមន៍បាញ់ទឹកពន្លត់ កាលពីវេលាម៉ោង៨ និង៥០នាទីយប់ ថ្ងៃទី៨ ខែមេសា ឆ្នាំ២០២០ ។
បេីតាមសម្ដីប្រជាពលរដ្ឋដែលនៅក្បែរកន្លែងកេីតហេតុ និងឃេីញហេតុការណ៍បានឲ្យដឹងថា ដំបូងគេឃេីញមានទុស្សេខ្សែរភ្លេីងក្បែដំបូលផ្ទះល្វែងរងគ្រោះ រួចក៏ឆេះរាលដាលដល់ពិដានជាន់ខាងលេីចេញជាផ្សែងពណ៌ខ្មៅហុយពេញមេឃ ទេីបម្ចាស់ផ្ទះ និងប្រជាពលរដ្ឋនាំគ្នាប្រញ៉ាប់យកបំពង់ពន្លត់អគ្គីភ័យបាញ់ពន្លត់ តែមិនរលត់នោះទេ ទេីបម្ចាស់ផ្ទះ និងប្រជាលរដ្ឋរាយការណ៍ជូនសមត្ថកិច្ចមូលដ្ឋានឲ្យចុះមកជួយអន្តរាគមន៍ ។
ក្នុងករណីអគ្គីភ័យនេះបានឆាបឆេះពិដានជាន់ខាងលេីនៃផ្ទះល្វែង រងការខូចខាតមួយចំនួន ដោយប្រេីរថយន្តពន្លត់អគ្គីភ័យបាញ់ទឹកពន្លត់អស់ចំនួន២ឡាន ទេីបរលត់ទៅវិញជាស្ថាពរ ។ ចំពោះមូលហេតុ សមត្ថកិច្ចបានសន្និដ្ឋានថា បណ្ដាលមកពីទុស្សេខ្សែភ្លេីង ៕
