ស្រវឹងស្រា យកកាំភ្លើងជ័រភ្ជង់គេឯងត្រូវសមត្ថកិច្ចចាប់វាយខ្នោះ
ភ្នំពេញ ៖ បុរសម្នាក់ស្រវឹងស្រា បានធ្វើសកម្មភាពយកកាំភ្លើងជ័រភ្ជង់គេឯង បង្កឱ្យមានការភ្ញាក់ផ្អើល កាលពីវេលាម៉ោង ៨និង ១០នាទីយប់ថ្ងៃសៅរ៍ទី១១ខែមេសា ឆ្នាំ ២០២០ នៅចំណុចផ្លូវបេតុងជាប់របងមន្ទីរពេទ្យរ៉ូយ៉ាល់ភ្នំពេញ ក្នុងភូមិសេ ប៉េ សេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនរងគ្រោះនិងជនបង្កមិនត្រូវបានស្គាល់អត្តសញ្ញាណនោះទេ។
យោងតាមប្រភពពីកន្លែងកើតហេតុបានឲ្យដឹងថា មុនដំបូងគេឃើញ បុរសម្នាក់ស្រវឹងស្រាជិះម៉ូតូម៉ាកហុងដា ឌ្រីម ស៊េរីឆ្នាំ២០០៩ ពណ៌ខ្មៅ ពាក់ស្លាកលេខភ្នំពេញ1AF-3678 ជិះតាមបណ្តោយផ្លូវបេតុងទឹសដៅពីជើងទៅត្បូង មកឈប់ត្រង់ចំណុចកើតហេតុខាងលើ រួចក៏ដកកាំភ្លើងចេញពីចង្កេះភ្ជង់ជនជាតិចិនម្នាក់ធ្វើឲ្យជនជាតិចិន ភ័យរត់ចេញពីកន្លែងកើតហេតុ ខណៈពេលនោះស្រាប់តែមាន យុវជនម្នាក់ជាជនរងគ្រោះបានជិះម៉ូតូមកដល់កន្លែងកើតហេតុរៀបនឹងបត់ចូលផ្ទះទៅហើយ ក៏ត្រូវបានជនបង្ក ភ្ជង់គំរាមបាញ់ ធ្វើឲ្យជនរងគ្រោះភ័យស្លន់ស្លោរបង្កឱ្យមានការភ្ញាក់ផ្អើលដល់សមត្ថកិច្ចចុះមកអន្តរាគមន៍ចាប់ឃាត់ខ្លួនជនសង្ស័យទើបដឹងថាជាកាំភ្លើងជ័រ ។
ក្រោយពេលកើតហេតុសមត្ថកិច្ចក៏បាននាំខ្លួនជនសង្ស័យនិងឲ្យជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកថ្លាដើម្បីសួរនាំនិងធ្វើកំណត់ហេតុបញ្ជូនទៅអធិការដ្ឋានខណ្ឌសែនសុខ ចាត់ការបន្តតាមនីតិវិធីច្បាប់៕
