បើករថយន្តលឿនខ្វះការប្រុងប្រយត្ន័រេចង្កូតបុកបង្គោលភ្លើងក្រឡាប់ផ្ងារជើង
ភ្នំពេញ ៖ បុរសម្នាក់រងរបួសបែកក្បាល បន្ទាប់ពីបើករថយន្ត លឿនដូចហោះខ្វះការប្រុងប្រយត្ន័រ៉េចង្កូតជ្រុលទៅបុកបង្គោលភ្លើងបំភ្លឺផ្លូវបាក់រាបដល់ដីអស់មួយដើមហើយរថយន្ត ក្រឡាប់ផ្ងារមួយចំហៀង ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១២និង២០នាទី រំលងអធ្រាត្រឈានចូលថ្ងៃទី១៤ ខែមេសាឆ្នាំ២០២០ នៅតាមបណ្ដោយផ្លូវ៦០ម៉ែត្រ ភូមិព្រែកឡុង២ សង្កាត់ ចាក់អង្រែក្រោម ខណ្ឌ មានជ័យ រាជធានី ភ្នំពេញ។
បុរសដែលបើករថយន្តបង្ក មិនត្រូវបានស្គាល់អត្តសញ្ញាណ នោះទេ ជិះរថយន្តម៉ាក ឡិចសុីសGS300 ពណ៏ខ្មៅ ស៊េរីឆ្នាំ២០០៦ ពាក់ស្លាកលេខ ភ្នំពេញ2AZ-3357
យោងតាមប្រភពពីកន្លែងកើតហេតុបានឲ្យដឹងថា មុនដំបូងគេឃើញ រថយន្តបង្កម៉ាកឡិចសុីស បើកបរតាមបណ្ដោយផ្លូវ៦០ម៉ែត្រ ទិសដៅពីជើងមកត្បូង ក្នុងល្បឿនលឿនខណៈមកដល់ចំណុចកើតហេតុខាងលើក៏ស្រាប់តែរ៉េចង្កូតមកឆ្វេងដៃក៏ជ្រុលទៅបុកបង្គោលភ្លើងបំភ្លឺផ្លូវបណ្ដាលឲ្យបាក់ដល់ដីអស់ ១ដើមនិងរថយន្តក្រឡាប់ផ្ងារជើងមួយចំហៀង រងរបួសអ្នកបើកបរបែកក្បាលភ្លាមៗក៏មានអ្នកមកដឹកយកទៅមន្ទីពេទ្យសង្រ្គោះជីវិតផងដែល ចំណែកឯរថយន្តវិញរងការខូចខាតស្ទើរ តែទាំងស្រុង។
ក្រោយពេលកើតហេតុសមត្ថកិច្ចជំនាញចុះមកវាស់វែងនិង ទាក់ទងទៅខាងបង្គោលភ្លើងមកដល់បានសម្របសម្រួលគ្នាជាមួយភាគីខាងរថយន្តបង្ក សងថ្លៃខូចខាតបញ្ចប់រឿងនៅកន្លែងកើតហេតុ៕
