អាណិតណាស់! បុរសវ័យចំណាស់ម្នាក់កូនទៅស្រុកវិញ តែអកុសលដល់កណ្ដាលផ្លូវខ្យល់(គ)ស្លាប់
ភ្នំពេញ ៖ បុរសវ័យចំណាស់ម្នាក់ មកពីលេងកូននៅកន្លែងធ្វើការ ត្រឡប់ទៅស្រុកវិញដោយជិះរថយន្តឈ្នួល ជាមួយកូនបង្កើតនិងកូនប្រសារ ខណៈមកដល់ពាក់កណ្តាលផ្លូវ ស្រាប់តែកើតមានអាការៈមិនស្រួលខ្លួន ត្រូវរថយន្តឈ្នួលទម្លាក់ចុះ ស្រាប់តែ្រដរខ្យល់ស្លាប់នៅចញ្ចើមផ្លូវ យ៉ាងអាណោចអធម៌ បង្កការភ្ញាក់ផ្អើលយ៉ាងខ្លាំង កាលពីវេលាម៉ោង១២ថ្ងៃត្រង់ទី២៦ ខែឧសភា ឆ្នាំ២០២០ នៅចំណុចក្បែរផ្សារចោមចៅ ក្រុម៤ ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ។
សពជនរងគ្រោះឈ្មោះ សុីម ធឿន ភេទប្រុស អាយុ៥៣ឆ្នាំ មុខរបរ កសិករ មានទីលំនៅភូមិបឹងកណ្តាលឃុំខ្ពបអាទាវ ស្រុកលើកដែក ខេត្តកណ្តាល ។
ចំណែកកូនប្រុសស្រីទាំង២នាក់ ៖ ទី១-មានឈ្មោះ ពឿន ធឿន ភេទប្រុស អាយុ២៤ឆ្នាំ មុខរបរ កម្មករចំការស្វាយ ស្នាក់នៅចំការស្វាយ ភូមិព្រៃប្រសិទ្ធ ឃុំអូរបាក់រទេះ ស្រុកកំពង់សិលា ខេត្តព្រះសីហនុ មានស្រុកកំណើតនៅភូមិពោធិរៀង ឃុំកំពង់ឫស្សី ស្រុកពោធិរៀង ខេត្តព្រៃវែង ត្រូវជាកូនប្រសារ ។
ទី២-ឈ្មោះ ធឿន ស្រីនិច ភេទស្រីអាយុ២០ឆ្នាំ មុខរបរ និងស្នាក់នៅជាមួយគ្នា មានស្រុកកំណើត ភូមិបឹងកណ្តាល ឃុំខ្ពបអាទាវ ស្រុកលើកដែក ខេត្តកណ្តាល ត្រូវជាកូនបង្កើតរបស់ជនរងគ្រោះ។
តាមសម្តីបុរសជាកូនប្រសារ បានឲ្យដឹងថា ឪពុកក្មេករបស់គេ បានទៅលេងពួកគេ ដល់ចំការស្វាយ កន្លែងពួកគេធ្វើការ ឯស្រុកកំពង់សិលា កាលពីព្រឹកថ្ងៃទី២៥ ខែឧសភាឆ្នាំ២០២០ ខណៈដែលគាត់មិនស្រួលខ្លួនផង លុះមកដល់ព្រឹកថ្ងៃទី២៦ខែឧសភា ឆ្នាំ២០២០ គាត់២នាក់ប្តីប្រពន្ធក៏បានជូនឪពុកវិលត្រឡប់មកផ្ទះ ឯស្រុកលើកដែកវិញ ដោយធ្វើដំណើរតាមរថយន្តឈ្នួល សាំយ៉ុង តែជាអកុសល ខណៈមកដល់ក្បែរផ្សារចោមចៅ ផ្លូវចោមចៅ ស្រាប់តែឪពុកកើតមានអាការៈ មិនស្រួលខ្លួន វិលងងឹតមុខ ភ្លាមៗត្រូវបានរថយន្តឈ្នួលដាក់ទម្លាក់ចុះ ហើយបើកចេញចោលទៅបាត់ ដោយទុកពួកគាត់នៅចិញ្ចើមផ្លូវ ភ្លាមៗជនរងគ្រោះដែលជាឪពុកបានត្រដរខ្យល់ស្លាប់តែម្ដង។
ក្រោយកើតហេតុសមត្ថកិច្ចមូលដ្ឋាននិងជំនាញបានចុះមកពិនិត្យ និងធ្វើកោសល្យវិច័យ ហើយដោយមានការបំភ្លឺរបស់ក្រុមគ្រួសារ ថាជនរងគ្រោះមានជម្ងឺប្រចាំកាយ ឈឺក្រពះរាំរ៉ៃ សមត្ថកិច្ចបានសន្និដ្ឋានថាជនរងគ្រោះស្លាប់ដោយខ្យល់(គ) រួមជាមួយជម្ងឺផ្ទាល់ខ្លួន បន្ទាប់មកសមត្ថកិច្ចបានធ្វើកំណត់ហេតុប្រគល់សពជូនក្រុមគ្រួសារ ចាត់ចែងដឹកយកទៅធ្វើបុណ្យនៅឯស្រុកតាមប្រពៃណី ៕
