ជនជាតិចិនតៃវ៉ាន់ម្នាក់ ខ្យល់គដួលស្លាប់ក្នុងផ្ទះ បង្កការភ្ញាក់ផ្អើលទាំងព្រឹក

ភ្នំពេញ​ ៖​ បុរសជនជាតិចិនតៃវ៉ាន់ម្នាក់ ខណៈ​ដែលមានជម្ងឺប្រចាំកាយផង អូសម៉ូតូចេញ​បំណង់ឌុបប្រពន្ធទៅរកបើកលុយ ស្រាប់តែជួបគ្រោះអកុសល ខ្យល់គដួលស្លាប់ភ្លាមៗក្នុងបន្ទប់ជួល បង្កការភ្ញាក់ផ្អើលកាលពីវេលា​ម៉ោង៦និង៣០នាទីព្រឹក ថ្ងៃទី៣១ ខែឧសភា ឆ្នាំ២០២០ នៅផ្ទះជួល ផ្លូវលំ ក្រុម៥ ភូមិព្រៃជី​សាក់ សង្កាត់ចោមចៅ៣ ខណ្ឌពោធិសែនជ័យ ។

បើតាមស្ត្រីជាភរិយារបស់សព បានឲ្យដឹងថា ជនរងគ្រោះមានឈ្មោះ ឡុង គឺ ហៅ ជីច ឃី ភេទប្រុស អាយុ៦៣ឆ្នាំ ជនជាតិចិនតៃវ៉ាន់ មុខ​របរជាមេការរោងចក្រ ចំណែកគាត់ជា​ប្រពន្ធឈ្មោះ នុង ស្រីពេជ្រ អាយុ៣៤ឆ្នាំ មុខ​របរ កម្មការនីរោងចក្រជាមួយគ្នា ស្នាក់នៅផ្ទះកើតហេតុជាមួយគ្នា មានស្រុកកំណើត ភូមិព្រៃតាឌុក ឃុំសំរោង ស្រុកត្រាំកក់ ខេត្តតាកែវ ។ យោងតាមឯកសារពេទ្យមួយ​សន្លឹក ឃើញថាជនរងគ្រោះ ឈ្មោះ Jacky អាយុ៥៨ឆ្នាំ ។

ស្ត្រីជាប្រពន្ធបន្តទៀតថា គាត់បានគ្នាជាប្តីប្រពន្ធអស់រយៈពេលជាង៣ឆ្នាំមក​ហើយ តាំងពីអំឡុងឆ្នាំ២០១៧ មានកូន២នាក់ ប្រុសម្នាក់អាយុជាង១ខួប និងបច្ចុប្បន្នកំពុងមាន​ផ្ទៃពោះជាង៥ខែផងដែរ ។

ស្ត្រីដដែលរាប់រាប់ថា ប្តីរបស់គាត់ មានជម្ងឺ គ្រួសក្នុងប្រមាត់​ ប្រើប្រាស់ថ្នាំជាប្រចាំ ហើយ​មុនកើតហេតុ ប្តីរបស់គាត់ក្រោយពី​ងើបដាំបបរហើយ រៀបចំខ្លួនបំណង់នាំគាត់ជាប្រពន្ធទៅបើកលុយនៅរោងចក្រ គ្រា​ដែល​ដើរទៅបំរ៉ុងបណ្តើរអូសម៉ូតូចេញ ស្រាប់​តែដួលប្រកាច់ត្រដរខ្យល់ស្លាប់តែ​ម្ដង​ភ្លាមៗគាត់ស្រែកហៅអ្នកជិតខាងឲ្យជួយតែជួយមិនទាន់ ជនរងគ្រោះស្លាប់បាត់ទៅ​ហើយ។

ក្រោយកើតហេតុ រាយការណ៍ទៅអាជ្ញាធរ និងសមត្ថកិច្ចចុះទៅពិនិត្យ សាកសួរជាក់​ស្តែង ឃើញថាស្លាប់ដោយជម្ងឺខ្យល់គ រួចដឹកសពទៅតំកល់ទុកនៅវត្តស្ទឹងមានជ័យ ដើម្បីពិនិត្យស្រាវជ្រាវ រកក្រុមគ្រួសារ រាយការណ៍ទៅស្ថានទូត ដើម្បីសម្រេចជាក្រោយ ៕