យុវជនម្នាក់ផ្លោះរបងចូលផ្ទះប្រជាពលរដ្ឋ ត្រូវម្ចាស់ផ្ទះឃើញចាប់ប្រគល់ឲ្យសមត្ថកិច្ច
ភ្នំពេញ ៖ ជនសង្ស័យម្នាក់បានផ្លោះរបងចូលផ្ទះរបស់ប្រជាពលរដ្ឋ រួចឡើងលើសំយ៉ាបផ្ទះស័ង្កសីបំណងចូលទៅក្នុងផ្ទះជាន់ទីមួយត្រូវម្ចាស់ផ្ទះឃើញ ស្រែកឱ្យចុះមកក្រោមចាប់ប្រគល់ឲ្យសមត្ថកិច្ច
ហេតុការណ៍នេះបានកើតឡើងកាលពីវេលាម៉ោង២រំលងអធ្រាត្រឈានចូលថ្ងៃទី០១ ខែមិថុនា ឆ្នាំ២០២០ នៅចំណុចជិតផ្ទះសំណាក់ស្ទឹងលាភ នៅតាមបណ្ដោយផ្លូវ លូ ខាងក្រោយក្រុមហ៊ុនស្រាបៀរកម្ពុជា ភូមិស្ទឹងមានជ័យ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
យុវជនសង្ស័យមានឈ្មោះ ឡាង យ៉ុង ភេទប្រុស អាយុ២០ឆ្នាំ មុខរបររៀនជួសជុលរថយន្ត ស្នាក់នៅម្ដុំពោធិ៍ចិនតុង។
ចំណែកឯម្ចាស់ផ្ទះឈ្មោះ សម្រិត សឿន ភេទប្រុសអាយុ៥៩ឆ្នាំ ជនជាតិខ្មែរ មុខរបរជាមន្ត្រីរាជការចូលនិវត្តន៍ ស្នាក់នៅផ្ទះលេខ២៥B ផ្លូវ២៧១ សង្កាត់ ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
យោងតាមសម្ដីរបស់ម្ចាស់ផ្ទះបានប្រាប់ឲ្យដឹងថា ដំបូងគាត់ឮសូរសំយ៉ាបស័ង្កសី លាន់សូរសម្រិតជើងមនុស្សដើរគាត់ក៏បានចេញ មកខាងក្រៅផ្ទះស្រាប់តែឃើញជនសង្ស័យម្នាក់បំណងប្រុងផ្លោះចូលទៅតាមបង្អួចផ្ទះរបស់គាត់នៅជាន់ទីមួយគាត់ក៏បានស្រែកប្រាប់បងប្អូនរបស់គាត់ចេញមកព្រមគ្នាហើយបានឱ្យជនសង្ស័យចុះតាមសម្រួល។ បងប្អូនរបស់គាត់មានអ្នកខ្លះកាន់ដំបងខ្លះកាន់កាំបិតនិងកាន់ដែកដើម្បីការពារខ្លួនដើម្បីកុំឲ្យជនសង្ស័យតដៃ ហើយក៏ចាប់ប្រគល់ឱ្យសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ យកទៅសួរនាំ។
ក្រោយពេលកើតហេតុជនសង្ស័យត្រូវបានសមត្ថកិច្ចយកសួរនាំនិង ឱ្យជនរងគ្រោះទៅដាក់ពាក្យបណ្ដឹង ធ្វើកំណត់ហេតុបញ្ជួនទៅអធិការខណ្ឌមានជ័យ ដើម្បីកសាងសំណុំចាត់ការបន្តតាមនីតិវិធី ៕
