ចាប់ខ្លួននាយការិយាល័យគ្រឿងញៀននៃកងរាជអាវុធហត្ថខេត្តតាកែវ រួមជាមួយស្ត្រីម្នាក់ពាក់ពន្ធ័ ករណីជួញដូរគ្រឿងញៀន
តាកែវ ៖ កម្លាំងនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ ចាប់ឃាត់ខ្លួនលោកឈុន សុមេធា កងរាជអាវុធហត្ថខេត្តតាកែវ(តួនាទី) នាយការិយាល័យប្រឆាំងបទល្មើសគ្រឿងញៀន និងស្ត្រីម្នាក់ដកហូតថ្នាំញៀន ប្រហែល២គីឡូក្រាម៖ ហេតុការណ៍នេះបានធ្វើឡើងកាលពីថ្ងៃទី០៤ខែមិថុនាឆ្នាំ២០២០ រួចបន្តចុះសហការជាមួយកម្លាំងស្នងការដ្ឋាននគរបាលខេត្តតាកែវ និងមានការសំរបសំរួលនីតិវិធី ពីលោកសឿន មុន្នីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ និងលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ ។
បានចុះទៅឆែកឆេរក្នុងលំនៅដ្ឋានរបស់ជនសង្ស័យចំនួនពីរទីតាំង៖ ទី១-នៅផ្ទះរបស់ជនសង្ស័យ ឈុន សុមេធា នៅភូមិកំពង់ហ្លួង ឃុំអង្គរបូរីស្រុកអង្គរបូរី ខេត្តតាកែវ ដកហូតវត្ថុតាងបាន អាវុធខ្លីចំនួន២ដើម(ប្រើហ្គាស់)និងជញ្ជីងថ្លឹងថ្នាំញៀន០១គ្រឿង និងរុក្ខជាតិញៀន(កញ្ឆា)ក្រៀមចំនួន០២ស្បោង។
ទី២- នៅបន្ទប់ជួលរបស់ជនសង្ស័យ ឈ្មោះ កេន ចាន់រី ភេទស្រី នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដកហូតវត្ថុតាងបានម៉ាស៊ីនកាមេរ៉ាសុវត្ថិភាព១គ្រឿង ស្លាកលេខម៉ូតូចំនួន០៣ និងកាតគ្រីម៉ូតូ០២សន្លឹក។
យោងតាមរបាយការណ៍របស់សមត្ថកិច្ចបានអោយដឹងថា ជនសង្ស័យ ទី០១-មានឈ្មោះ ឈុនសុមេធា ភេទប្រុស មុខរបរ កងរាជអាវុធហត្ថខេត្តតាកែវ( មានឋានន្តរស័ក្តិ វរសេនីយ៍ត្រី ឋានៈជានាយការិយាល័យបទល្មើសគ្រឿងញៀន )។
ទី០២-ឈ្មោះ កេន ចាន់រី ភេទស្រី មុខរបរមិនពិតប្រាកដ ។
បច្ចុប្បន្ន ជនសង្ស័យទាំងពីរនាក់រួមជាមួយវត្ថុតាងត្រូវបានកម្លាំងនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ នាំខ្លួនយកទៅមន្ទីរប្រឆាំងគ្រឿងញៀន ដើម្បីកសាងសំណុំរឿងចាត់ការតាមនីតិវិធីច្បាប់ ៕
