ឆ្លងចរន្តភ្លើងឆេះរថយន្តដឹកអេតចាយសន្ធោសន្ធៅបង្កការភ្ញាក់ផ្អើលទាំងយប់
ភ្នំពេញ ៖ រថយន្តហុីយិនដាយដឹកអេតចាយពេញបានឆេះយ៉ាងសន្ធោសន្ធៅ បង្កការភ្ញាក់ផ្អើលកាលពីវេលាម៉ោង២និង២០នាទីរំលងអធ្រាត្រឈានចូលថ្ងៃទី១៣ ខែកក្កដា ឆ្នាំ២០២០ នៅតាមបណ្ដោយផ្លូវ២១៧ត្រង់ចំណុចឃ្លាំងអេតចាយទាល់មុខការ៉ាស់សាំងកាលតិច ស្ថិតក្នុងសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។
រថយន្តដែលឆេះម៉ាកហុីយិនដាយ ពណ៌ស ពាក់ស្លាកលេខ ភ្នំពេញ3D-5486 ដឹកអេតចាយនៅពីលើរថយន្តពេញ។
បើតាមសម្តីអ្នកដែលដេកនៅក្នុងឃ្លាំងអេតចាយបានប្រាប់ឲ្យដឹងថា ដំបូងឡើយរូបគាត់បានលឺសំលេងផ្ទុះចេញពីរថយន្តរូបគាត់ក៏ងើបមើលឃើញរថយន្តដឹកអេតចាយរអិលទៅបុក ទ្វារបណ្តាលឲ្យដាច់ស្រយ៉ៅទ្វារចេញមកក្រៅឆេះយ៉ាងសន្ធោសន្ធៅបង្កឲ្យមានការភ្ញាក់ផ្អើលដល់សមត្ថកិច្ចនិងប្រជាពលរដ្ឋក៏នាំគ្នាទាញទុយោទឹកនិង យកបំពង់ពន្លត់អគ្គីភ័យមកបាញ់អស់ជាច្រើនបំពង់ទើបរលត់ទៅវិញ សំណាងល្អមិនមានអ្នករងរបួសនិងរៀលដាលឆេះដល់ឃ្លាំងនិងផ្ទះប្រជាពលរដ្ឋ ។
ក្នុងហេតុការណ៏ខាងលើនេះគេសន្និដ្ឋានថាបណ្តាលមកពីឆ្លងចរន្តភ្លើងចេញពីកាប៊ីនរថយន្តទើបណ្តាលឲ្យឆេះជាអណ្តាតភ្លើងឡើងធ្វើឲ្យខូចខាតរថយន្តផ្នែកខាងមុខខ្ទិចម៉ត់តែម្តង៕
