ជិះម៉ូតូលឿនមិនប្រយត្ន័ជ្រុលបុកបង្គោលថ្មដួលបោកបែកក្បាលស្លាប់យ៉ាងអាណោចអធម៌
ភ្នំពេញ ៖ បុរសម្នាក់ជិះម៉ូតូលឿនខ្វះការប្រុងប្រយត្ន័ដល់ផ្លូវកោងបត់មិនទាន់ក៏ជ្រុលទៅបុកបង្គោលថ្មរបងផ្ទះប្រជាពលរដ្ឋបណ្ដាលឲ្យដួលបោកនឹងថ្នល់ បែកក្បាលស្លាប់យ៉ាងអាណោចអធម៌ ដោយសារមិនពាក់មួក សុវត្ថិភាព ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៤និង៥០នាទី ព្រឹកព្រលឹមថ្ងៃទី២៩ ខែកញ្ញា ឆ្នាំ២០២០ នៅចំណុចមុខផ្ទះលក់ទូរសព្ទដៃរ៉ាវី២ ខាងកើតរោងចក្រឃ្យូអឹមអាយប្រមាណ១០០ម៉ែត្រតាមបណ្ដោយផ្លូវបេតុងស្ថិតនៅក្នុងភូមិត្រពាំងពោធិ៍ សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះមានឈ្មោះ កាយ មករា ភេទប្រុស អាយុ២១ឆ្នាំ ជនជាតិខ្មែរ មុខរបរមើលកាមរ៉ាសុវត្តិភាពឲ្យក្រុមហ៊ុនមួយកន្លែង រស់នៅម្តំសង្កាត់កំបូល ខណ្ឌកំបូល រាជធានីភ្នំពេញ។ ជិះម៉ូតូម៉ាកXR ពណ៌សលាយខ្មៅ ពាក់ផ្លាកលេខ តាកែវ1L-1080 ។
យោងតាមប្រភពពីកន្លែងកើតហេតុបានឲ្យដឹងថាមុន ពេលកើតហេតុគេឃើញបុរសរងគ្រោះខាងលើជិះម៉ូតូម៉ាកXRតាមបណ្តោយផ្លូវបេតុងទិសដៅពីកើតទៅលិចយ៉ាងលឿន ខណៈមកដល់ចំណុចកើតហេតុដោយសារផ្លូវកោងផងមិនប្រយ័ត្នក៏ជ្រុលទៅបុកបង្គោលថ្មរបងផ្ទះប្រជាពលរដ្ឋបណ្ដាលឲ្យដួលបោកក្បាលនឹងថ្នល់ស្លាប់មួយរំពេចយ៉ាងអណោចអធម៌។
ក្រោយពីកើតហេតុសមត្ថកិច្ចជំនាញចុះមកវាស់វែងយកម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដោយឡែក សពសមត្ថកិច្ចធ្វើកំណត់ហេតុរួចប្រគល់ឱ្យសាច់ញាតិទទួលយកធ្វើបុណ្យតាមប្រពៃណី៕
