ពិតជាសាហាវព្រៃផ្សៃមែន! ខ្មាន់កាំភ្លើងបើករថយន្តទំនើបបាញ់រះ មកលើ អ្នករត់ម៉ូតូកង់បីជាច្រើនគ្រាប់ នៅខណ្ឌទួលគោក
ភ្នំពេញ ៖ បុរសអ្នកបើកម៉ូតូកង់បីឥណ្ឌាម្នាក់ភ័យស្ទើលុះព្រលឹងស្លាប់ ខណៈបើកម៉ូតូកង់បីតាមផ្លូវត្រូវ ខ្មាន់កំភ្លើងបើករថយន្តស៊េរីទំនើបមួយគ្រឿងដកកាំភ្លើងបាញ់រះ ចំនួន៥ គ្រាប់មកលើកង់បី តែត្រូវ១គ្រាប់ចំម៉ូតូកង់បី សំណាងល្អម្ចាស់មិនអី ឯខ្មាន់កាំភ្លើងបើករថយន្តគេចខ្លួន បាត់ស្រមោល ។
ហេតុការណ៍នេះបង្កឲ្យមានការភ្ញាក់ផ្អើលដល់ប្រជាពលរដ្ឋនិងកម្លាំងសមត្ថកិច្ចកាលពីវេលាម៉ោង១០យប់ថ្ងៃទី២៦ខែតុលាឆ្នាំ២០២០ នៅចំណុចមុខសាកលវិទ្យាល័យភូមិន្ទ តាមបណ្ដោយផ្លូវសហព័ន្ធរុស្ស៊ី កែងផ្លូវ ២៦១ ក្នុងសង្កាត់ទឹកល្អក់ ទី១ ខណ្ឌទួលគោក រាជធានីភ្នំពេញ។
យោងតាមប្រភពពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់បើកម៉ូតូកង់បីឥណ្ឌា ពណ៌លឿង មួយគ្រឿង និងរថយន្តស៊េរីទំនើប ពណ៌ស មួយគ្រឿងមិនចាំស្លាកលេខ ដោយធ្វើដំណើរចុះពីស្ពានអាកាស៧មករា ក្នុងទិសដៅពីលិចទៅកើត ដោយមិនដឹងថាមានទំនាស់គ្នារឿងអ្វីនោះទេ ខណៈមកដល់ចំណុចកើតហេតុខាងលើខាងម៉ូតូកង់បីនៅខាងមុខ ឯរថយន្តនៅខាងក្រោយបញ្ឆិតគ្នា ស្រាប់តែខ្មាន់កាំភ្លើងដែរបើករថយន្តស៊េរីទំនើប ហើយបានបើកកញ្ចក់ដកកាំភ្លើងបាញ់រះទៅលើអ្នកបើកម៉ូតូកង់បីចំនួន៥គ្រាប់ បណ្ដាលឲ្យ១គ្រាប់ ត្រូវម៉ូតូកង់បីធ្លុះ។ ភ្លាមៗនោះខ្មាន់កាំភ្លើងបានឈប់រថយន្តមួយភ្លែតហើយក៏បិទកញ្ចក់រថយន្តវិញបើក ចេញទៅបាត់។ ចំណែកជនរងគ្រោះដែលជាម្ចាស់ម៉ូតូកង់បី មិនបានប្រាប់ពីមូលហេតុ អ្វីឲ្យពិតប្រាកដនោះទេ គ្រាន់តែបានប្រាប់ថា ខ្មាន់កាំភ្លើងជិះរថយន្តម៉ាករ៉ូរ៉យ មួយគ្រឿងពណ៌ស ពាក់ផ្លាកលេខ កម្ពុជា។ ក្រោយហេតុការភ្លាមៗខ្មាន់កាំភ្លើងបានបើករថយន្តគេចចេញពីកន្លែងកើតហេតុ បាត់ស្រម៉ោល។ ចំណែកភាគីម៉ូតូកង់បី ក៏មិនបានធ្វើការរៀបរាប់វែងឆ្ងាយនោះដែរបានបើកម៉ូតូកង់បីបន្តដំណើរទៅមុខបាត់ ដោយមិនបានទៅដាក់ពាក្យបណ្ដឹងនៅប៉ុស្តិ៍នគរបាលនោះទេ។
ក្រោយមកគេឃើញវត្តមានលោក សុខ ហេង អធិការខណ្ឌទួលគោក បានដឹកនាំកម្លាំងចុះមកពិនិត្យនឹងធ្វើការសួរនាំនៅនឹងកន្លែងកើតហេតុ ដើម្បីធ្វើការស្រាវជ្រាវរកជនបង្កដើម្បីយកមកផ្តន្ទាទោសទៅតាមផ្លូវច្បាប់ ៕
