ល្បែងស៊ីសង Keno Online កំពុងប្រឈមហានិភ័យ !
ភ្នំពេញ៖ឆ្នោតឡូតូ នៃក្រុមហ៊ុន ស៊ីន នីវ អ៊ិនវេសមេន ឯ.ក ដែលមានម្ចាស់ឈ្មោះ Wang Peter ត្រូវបានមជ្ឈដ្ឋានជាច្រើនមើលឃើញថា កំពុងបំប្លែងជាល្បែងស៊ីសងយ៉ាងអនាធិបតេយ្យ និង បើកលេងជាសាធារណៈស្ទើរគ្រប់ទីកន្លែងទូទាំងប្រទេស តាមរយៈល្បែងអនឡាញមួយ ដែលមានឈ្មោះ ថា «Keno Online»។
ក្រោយមានប្រតិកម្មជាច្រើនពីប្រជាពលរដ្ឋនៃល្បែងស៊ីសង Keno Online នេះ កាលពីរសៀលថ្ងៃទី៣ ខែវិច្ឆិកា ឆ្នាំ២០២០ លោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានបញ្ជាអោយមានការស៊ើបអង្កេតជាបន្ទាន់ ។
លោកឧត្ដមសេនីយ៍ឯក សៀង សេន ប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម នៃអគ្គស្នងការដ្ឋាននគរបាលជាតិ បានអោយដឹងថា លោកបានទទួលបទបញ្ជាដ៏ម៉ឺងម៉ាត់ពី លោកនាយឧត្ដមសេនីយ៍អគ្គស្នងការនគរបាលជាតិ រួចហើយ ដើម្បីដឹកនាំកម្លាំងស្រាវជ្រាវករណីក្រុមហ៊ុន ស៊ីន នីវ ដែលប្រជាពលរដ្ឋរាយការណ៍ ថា បាននិងកំពុងបើកល្បែងស៊ីសងតាមអនឡាញ Keno Online ជ្រកក្រោមស្លាក ឆ្នោតឡូតូ ។
លោកឧត្ដមសេនីយ៍ឯក សៀង សេន បន្តថា ក្នុងករណីសមត្ថកិច្ចស្រាវជ្រាវរកឃើញការពិតដូចប្រជាពលរដ្ឋរាយការណ៍ មែននោះ គឺ សមត្ថកិច្ច នឹងចាត់ការតាមច្បាប់តែម្ដង ។
មជ្ឈដ្ឋានជាច្រើន មើលឃើញថា ក្រុមហ៊ុន ស៊ីន នីវ ដែលទទួលបានអាជ្ញាបណ្ណពីរាជរដ្ឋាភិបាល និង ក្រសួងសេដ្ឋកិច្ច និង ហិរញ្ញវត្ថុ អោយធ្វើអាជីវកម្មឆ្នោតឡូតូ បាននិងកំពុងបំប្លែងឆ្នោតឡូតូ មួយនេះ ទៅជាល្បែងស៊ីសងតាមអនឡាញ ពង្វក់ប្រជាពលរដ្ឋស្ទើរទូទាំងប្រទេសដោយគ្មានខ្លាចសមត្ថកិច្ចអ្វីទាំងអស់ ដោយក្រុមហ៊ុន បានដាក់តាំងទូរទស្សន៍តាមហាងនានាជាសាធារណៈ យ៉ាងអនាធិបតេយ្យ ថែមទៀតផង ៕
