នគរបាលខណ្ឌមានជ័យល្បាតក្នុងមូលដ្ឋានឃាត់ខ្លួនបុរសម្នាក់ជនសង្ស័យជាមុខសញ្ញាកាច់សោ.កម៉ូតូ
ភ្នំពេញ ៖ កម្លាំងអន្តរាគមន៍ពិសេសរបស់អធិការដ្ឋានខណ្ឌមានជ័យ ជិះម៉ូតូល្បាតក្នុងមូលដ្ឋានបានឃាត់ខ្លួនជនសង្ស័យម្នាក់ មានលាក់ទុកឧបករណ៍កាច់សោកម៉ូតូ និងដកហូតទូរស័ព្ទដៃមួយគ្រឿង
ហេតុការណ៍នេះបានកេីតឡេីងកាលពីវេលាម៉ោង១០និង៣០នាទីយប់ ថ្ងៃទី១៦ ខែវិច្ឆិកា ឆ្នាំ២០២០ នៅចំណុចក្បែរផ្ទះសំណាក់ស្រែលាភ តាមបណ្ដោយផ្លូវបេតុង ក្នុងភូមិស្ទឹងមានជ័យ សង្កាត់ស្ទឹងមានជ័យទី១ ខណ្ឌមានជ័យ។
សមត្ថកិច្ចបានឲ្យដឹងថា មុនពេលកេីតហេតុ កម្លាំងប៉ុស្តិ៍នគរបាលរដ្ឋបាលស្ទឹងមានជ័យទី១សហការជាមួយកម្លាំងអន្តរាគមន៍ខណ្ឌមានជ័យបានធ្វើការជិះម៉ូតូល្បាតក្នុងមូលដ្ឋាន ដេីម្បីទប់ស្កាត់បទល្មើសផ្សេងៗដែលអាចកេីតមាននៅក្នុងមូលដ្ឋាន។ លុះកម្លាំងសមត្ថកិច្ចជិះមកដល់ចំណុចខាងលើ ក៏ប្រទះឃើញជនសង្ស័យកំពុងតែដេីរតែម្នាក់ឯងដោយក្នុងលក្ខណៈសង្ស័យ។ បន្ទាប់មកកម្លាំងសមត្ថកិច្ចក៏បានហៅជនសង្ស័យឲ្យឈប់ដេីម្បីធ្វើការសួរនាំនិងឆែកឆេរលើខ្លួនជនសង្ស័យ ស្រាប់តែប្រទះឃើញឧបករណ៍សម្រាប់កាច់សោកម៉ូតូ ចំនួន១កំផ្លេ និងទូរស័ព្ទដៃមួយគ្រឿងម៉ាក អាយហ្វូនអ៊េចផ្លេីស ពណ៌ទឹកមាស។ រួចកម្លាំងសមត្ថកិច្ចក៏បានធ្វេីការចាប់វាយខ្នោះជនសង្ស័យភ្លាមៗតែម្តង។
សមត្ថកិច្ចបានបន្តថាជនសង្ស័យខាងលេីមានឈ្មោះ ជា ចយ ភេទប្រុស អាយុ៣៦ឆ្នាំ មុខរបរនិងស្នាក់នៅមិនពិតប្រាកដ។ ហេីយនៅចំពោះមុខសមត្ថកិច្ចជនសង្ស័យបានឆ្លងសារភាពថា ទូរស័ព្ទដៃដែលនៅនិងរូបគេ គឺគេទេីបតែធ្វេីសកម្មភាពឆក់យកពីស្ត្រីម្នាក់ដែលកំពុងឈប់និយាយទូរស័ព្ទតែម្នាក់ឯង កាលពីវេលាម៉ោង១២និង០០នាទី ត្រូវនិងថ្ងៃទី១៦ ខែវិច្ឆិកា ឆ្នាំ២០២០ ស្ថិតត្រង់ចំណុចក្រោមស្ពានអាកាសស្ទឹងមានជ័យ សង្កាត់ស្ទឹងមានជ័យទី១ ខណ្ឌមានជ័យ។
បច្ចុប្បន្នជនសង្ស័យរួមទាំងវត្ថុតាំងត្រូវបានសមត្ថកិច្ចនាំខ្លួនយកទៅសាកសួរនៅប៉ុស្តិ៍នគរបាលរដ្ឋបាលស្ទឹងមានជ័យទី១ និងធ្វើកំណត់ហេតុបញ្ជួនទៅអធិការនគរបាលខណ្ឌមានជ័យ កសាងសំណុំរឿងចាត់ការបន្តតាមនីតិវិធីច្បាប់៕
