ស្ត្រីម្នាក់ត្រូវបានក្រុមចោរឆក់យកកាបូបស្ពាយបានសំរេច ដែលក្នុងកាបូបនោះមានលុយចំនួន១៤០០ដុល្លារ និងទូរស័ព្ទដៃមួយគ្រឿង

ភ្នំពេញ៖ នៅរសៀលថ្ងៃទី០៨ ខែមករា ឆ្នាំ២០២១ នៅតាមបណ្តោយផ្លូវចោមចៅ សង្កាត់ចោមចៅ២ ខណ្ឌពោធិ៍សែនជ័យ ស្ត្រីម្នាក់ជាបុគ្គលិកក្រុមហ៊ុនម៉ូតូហុងដា បានស្រែកទ្រហោយំតាមផ្លូវទាំងដៃកាន់តែខ្សែកាបូបយកទៅប្តឹងសមត្ថកិច្ច ខណៈដែលនាងចេញពីធ្វើការហើយត្រូវជនសង្ស័យឆក់យកកាបូបស្ពាយទៅបាត់ដែលក្នុងកាបូបនោះប្រាក់ចំនួន១៤០០ដុល្លារនិងទូរស័ព្ទដៃមួយគ្រឿងទៀត។

មុនពេលកើតហេតុស្ត្រីរងគ្រោះបានជិះកង់បីចេញពីក្រុមហ៊ុនហុងដា បំណងទៅផ្ទះជួលនៅម្តុំផ្សារកាណាឌីយ៉ា សង្កាត់ចោមចៅទី១ ខណ្ឌពោធិ៍សែនជ័យ ខណះកំពុងជិះឆ្លងផ្លូវស្រាប់តែមានជនសង្ស័យចំនួន២នាក់ជិះម៉ូតូម៉ាកនិច ពណ៌ស មិនចាំស្លាកលេខមកពីក្រោយធ្វើសកម្មភាពឆក់យកកាបូបស្ពាយរបស់នាងបានសម្រេចបន្សល់ទុកតែខ្សែកាបូប រួចបន្ថែមល្បឿនម៉តូគេចខ្លួនបាត់ស្រមោលតែម្តងទៅ ។

ស្ត្រីរងគ្រោះបានបញ្ជាក់ថា ក្នុងកាបូបនោះមានប្រាក់សរុប១៤០០ដុល្លារ និងទូរស័ព្ទមួយគ្រឿង ។

ក្រោយកើតហេតុជនរងគ្រោះបានត្រឹមតែទៅដាក់ពាក្យបណ្តឹងនៅប៉ុស្តិ៍នគរបាលចោមចៅទី២ ដើម្បីឱ្យសមត្ថកិច្ចកំណត់មុខសញ្ញា៕