រថយន្តកុងតឺន័របុកនិងកិនបុរសម្នាក់អូសជាច្រើនម៉ែត្រដាច់ជាបំណែកៗស្លាប់យ៉ាងអាណោចអធម៌
ភ្នំពេញ ៖ បុរសម្នាក់បានស្លាប់បាត់បង់ជីវិតគួរឲ្យសង្វេកបន្ទាប់ពីដើរលើចិញ្ចើមផ្លូវសុខៗត្រូវរថយន្តកុងតឺន័រ បើកមកពីក្រោយបុកហើយកិន ពីលើអូសជាច្រើនម៉ែត្រ ។ ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង១០និង១៦នាទីយប់ថ្ងៃព្រហស្បតិ៏ ទី២១ ខែមករា ឆ្នាំ២០២១នៅចំណុច មុខបុរីជីបម៉ុង តាមបណ្ដោយផ្លូវ៣៧១ ក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
សពជនរងគ្រោះមានឈ្មោះ ចាន់ ដារ៉ា ហៅក្លូ ភេទប្រុស អាយុ៣០ឆ្នាំ ជនជាតិខ្មែរ រស់នៅក្បែកន្លែងកើតហេតុ។
តាមប្រភពពីកន្លែងកើតហេតុបានឲ្យដឹងថា ដំបូងឡើយគេឃើញបុរសរងគ្រោះដែលមានសតិមិនល្អបានដើរលើដងផ្លូវសុខៗ ខណះពេលនោះក៏ មានរថយន្តកុងតឺន័រ ក្បាលពណ័ខៀវ ពាក់ស្លាក លេខភ្នំពេញ3B.3934 និងរឺម៉កខាងក្រោយមានស្លាកលេខភ្នំពេញ4A.1760ធ្វើដំណើរតាមបណ្តោយផ្លូវ៣៧១ទិសដៅពីកើតទៅលិចក្នុងល្បឿនលឿនមធ្យម លុះមកដល់ចំណុចកើតហេតុខាងលើបានបុកហើយកិនពីលើជនរងគ្រោះអូសជាច្រើនម៉ែត្រដាច់ជាបំណែកៗស្លាប់មួយរំពេចរថយន្តបង្កមិនបានឈប់នៅកន្លែងកើតហេតុនោះទេព្យាយាមបើករត់ប្រមាណបាន៣០ម៉ែត្រទុក រថយន្តចោលចុះរត់គេចខ្លួនបាត់ស្រមោល។
ក្រោយកើតហេតុសមត្ថកិច្ចមូលដ្ឋានបានសហការជាមួយសមត្ថកិច្ចជំនាញចុះវាស់វែងយក រថយន្តបង្កទៅរក្សាទុករងចាំឲ្យម្ចាស់ក្រុមហ៊ុន ចូលខ្លួនដោះស្រាយតាមផ្លូវច្បាប់។
ដោយឡែកសពរងគ្រោះក្រោយពីសមត្ថកិច្ចធ្វើកំណត់ហេតុរួចប្រគល់ឲ្យក្រុមគ្រួសារដឹកយកទៅតម្កល់ទុកនៅវត្តចាក់អង្រែលើធ្វើបុណ្យតាមប្រពៃណី ៕
