បង្ក្រាបសង្វៀនជល់មាន់មួយកន្លែងនៅស្រុកថ្មគោល ឃាត់ខ្លួនមនុស្ស៣នាក់ ដកហូតមាន់គក៥ក្បាលនិងម៉ូតូ២៣គ្រឿង
ខេត្តបាត់ដំបង ៖ ក្រុមអ្នកញៀនល្បែងជល់មាន់ចំនួន០៣នាក់ ក្នុងចំណោមរាប់សិបនាក់ ដែលរត់មិនរួចត្រូវសមត្ថកិច្ចក្របួចជាប់ចាប់បានអាគកចំនួន០៥ក្បាល និង ប្រមូលបានម៉ូតូ២៣គ្រៀង ដែលម្ចាស់រត់ចោល ពេលកម្លាំងសមត្ថកិច្ចបង្ក្រាប
កាលពីរសៀលថ្ងៃទី២៩ ខែមករា ឆ្នាំ២០២១ ខណៈដែលក្រុមអ្នកបញ្ជល់មាន់នេះ កំពុងស្រែកហូរកញ្ជៀវនៅលើទូលកណ្ដាលវាលស្រែ ស្ថិតក្នុងភូមិត្រស់ ឃុំអូរតាគី ស្រុកថ្មគោល។
លោក ផង់ សុភាព អធិការនគរបាលស្រុកថ្មគោល បានឲ្យដឹងថា កម្លាំងរបស់លោកបានសហការជាមួយកម្លាំងប៉ុស្ដ៏មូលដ្ឋាន បានចុះបង្ក្រាបទីតាំងសង្វៀនបញ្ជល់មាន់នេះ។ ប៉ុន្តែសមត្ថកិច្ចឃាត់ខ្លួនបានអ្នកលេងត្រិមតែ០៣នាក់ប៉ុណ្ណោះ ខណៈអ្នកលេងជាច្រើននាក់ទៀត បានរត់ប្រសាចពេញស្រែ តែវត្តុតាងជាច្រើនត្រូវបានរឹបអូស។លោកបានប្រាប់ថា អ្នកលេងដែលឃាត់ខ្លួនទាំង០៣នាក់នោះមាន៖
១ឈ្មោះ ស៊ុម សំអឿន អាយុ៥៤ឆ្នាំ
២ឈ្មោះ ព្រិល បុល អាយុ៣៨ឆ្នាំ ទាំង២នាក់នេះនៅភូមិចែងក្ដា ឃុំភ្នំសំពៅ ស្រុកបាណន់ ។
៣ឈ្មោះ ប៊ុន លី អាយុ៥៤ឆ្នាំ នៅភូមិជ្រៃ ឃុំជ្រៃ ស្រុកថ្មគោល។
នៅក្នុងរបាយការណ៏របស់សមត្ថកិច្ច ពាក់ព័ន្ធនឹងវត្តុតាងដែលរឹបអូសបាន រួមមាន សង្វៀនសម្រាប់ជល់មាន់ចំនួន២ឈុត មាន់ជល់ចំនួន០៥ក្បាល ជញ្ជីងថ្លឹងមាន់ផ្គូផ្គងចំនួ០១ ម៉ូតូដែលអ្នកលេងរត់ចោលចំនួន២៣គ្រឿង និង សម្ភារៈសម្រាប់បំរើការក្នុងសង្វៀនមួយចំនួនទៀត។លោក ផង់ សុភាព បានប្រាប់ថា ក្រោយឃាត់ខ្លួន មន្ត្រីជំនាញរបស់លោកបានសួរនាំ និង បានបញ្ជូនបន្តទៅកាន់ស្នងការខេត្ត ដើម្បីចាត់ការតាមនិតិវិធីហើយ៕
