ឯកឧត្តម គង់ គឹមនី អភិបាលរងខេត្តក្រចេះ រៀបចំពិធីចាប់ឆ្នោតជ្រើសរើសដីឡូត៍ (ដីកសិកម្ម) ជូនសមាគមអតីតយុវជនកម្ពុជាខេត្ត និងអតីតកងកម្លាំងប្រដាប់អាវុធ និងគ្រួសារក្នុងខេត្ត ចំនួន៣៦គ្រួសារ
ខេត្តក្រចេះ៖ នាព្រឹកថ្ងៃពុធទី១៧ ខែមីនា ឆ្នាំ២០២១ ឯកឧត្តម គង់ គឹមនី អភិបាលរងខេត្ត តំណាងឯកឧត្តម វ៉ា ថន អភិបាលខេត្ត បានអញ្ជើញជាអធិបតីក្នុងពិធីចាប់ឆ្នោតជ្រើសរើសឡូត៍ដី (ដីកសិកម្ម) ជូនសមាគមអតីតយុវជនកម្ពុជាខេត្តក្រចេះ នៅទីតាំងសម្បទានដីសង្គមកិច្ច ដែលត្រូវប្រគល់ជូន អតីតកងកម្លាំងប្រដាប់អាវុធ និងគ្រួសារក្នុងខេត្ត ចំនួន៣៦គ្រួសារ ស្ថិតក្នុងភូមិសំបួរសែនជ័យ ឃុំស្វាយជ្រះ ស្រុកស្នួល ខេត្តក្រចេះ។
ដោយមានការចូលរួមពីលោកប្រធានមន្ទីរ ដ.ន.ស.ស ខេត្ត លោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តិការសឹករងក្រចេះ លោកអភិបាលស្រុកស្នួល ព្រមទាំងអាជ្ញាធរស្រុកឃុំជាច្រើននាក់ទៀត។
ឯកឧត្តម គង់ គឹមនី មានប្រសាសន៍ថា ដីកសិកម្ម ចំនួន១ហិកតា ក្នុងមួយគ្រួសារសម្រាប់ដីធ្លីដែលបានចែកជូនបងប្អូនប្រជាពលរដ្ឋនេះ គឺមិនអនុញ្ញាតឲ្យលក់ដូរនោះទេ។
ឯកឧត្តម អភិបាលរងខេត្ត ក៏បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ជូនដល់អតីតយុទ្ធជន ដែលរស់នៅទីនេះទាំងអស់គ្នា និងផ្តាំផ្ញើដល់បងប្អូនត្រូវចេះប្រុងប្រយត្ន័ការពារខ្លួនពីជំងឺកូវីដ១៩ និងខិតខំប្រឹងប្រែងបំពេញការងារដែលមានស្រាប់ ដើម្បីជួយដល់ជីវភាពគ្រួសារ និងត្រូវចេះសាមគ្គីគ្នាពេលមានធុរៈ ដោយមិនប្រកាន់ ពណ៌សម្បុរ ជាតិសាសន៍ ឬនិន្នាការនយោបាយឡើយ៕
