ស្គាល់រូបមិនស្គាល់ចិត្ត!!ខ្ចីម៉ូតូមួយភ្លែតបែជាយកទៅបញ្ចាំ
ភ្នំពេញ៖ នារីក្លាហានម្នាក់បានខ្ចីម៉ូតូមិត្តភក្កិរបស់ខ្លួនឯងមួយភ្លែតថាទៅយកទូរសព្ទ័បែរជាយកម៉ូតូទៅបញ្ចាំនៅផ្សារឃ្លាំងរំសេវ ត្រូវបានបងប្អូននិងម្ចាស់ម៉ូតូប្ដឹងសមត្ថកិច្ចប៉ុស្តិ៍នគរបាលរដ្ឋបាលទឹកល្អក់៣ ធ្វើការឃាត់ខ្លួនកាលពីវេលាម៉ោង១០ និង៤០ព្រឹកថ្ងៃទី១៩ ខែមីនាឆ្នាំ២០២១ នៅកន្លែងហាងបញ្ចាំម៉ូតូមួយកន្លែង តាមផ្លូវបេតុង សង្កាត់ទឹកល្អក់៣ ខណ្ឌទួលគោក។
នារីជាជនសង្ស័យដែលសមត្ថកិច្ចឃាត់ខ្លួនមានឈ្មោះ ភួង សុខហេង អាយុ៣២ឆ្នាំមុខរបរកម្មការនីិរោងចក្រ ស្នាក់នៅភូមិពារាមឃុំត្រពាំងយោង ស្រុកបាទី ខេត្តតាកែវ។
ឯនារីរងគ្រោះមានឈ្មោះ ជូន វ៉ាន់លីដាអាយុ៣០ ឆ្នាំមុខរបរកម្មការិនីរោងចក្រមានស្រុកកំណើតនៅភូមិព្រៃឈ្នួល ឃុំកំវៀង ស្រុកសំរោង ខេត្តតាកែវ។
បើតាមការរៀបរាប់ពីស្ត្រីរងគ្រោះដែលជាម្ចាស់ម៉ូតូបានប្រាប់ឲ្យដឹងថា ស្ត្រីជាជនសង្ស័យនិងរូបគេត្រូវជាមិត្តភក្កិ កាលនោះស្ត្រីជាជនសង្ស័យបានមកសុំនាងថាមកស្នាក់នៅជាមួយចំនួន២យប់ ដើម្បីរកការងារធ្វើ ហើយនៅថ្ងៃទី១៣ ខែមិនាឆ្នាំ២០២១នារីរងគ្រោះរួមជាមួយនឹងស្ត្រីជាជនសង្ស័យបានធ្វើតេស្តរោងចក្រមួយកន្លែងដែលនៅម្ដុំសាលាស្រុកបាទី ពេលនោះស្ត្រីជាជនសង្ស័យបានធ្វើតេស្តជាប់ហើយក៏បានត្រឡប់ទៅផ្ទះជនរងគ្រោះវិញ រហូតដល់វេលាម៉ោង៦ ល្ងាចថ្ងៃខែឆ្នាំដដែលស្ត្រីជាជនសង្ស័យបានខ្ចីម៉ូតូរបស់នារីរងគ្រោះម៉ាកហុងដាឌ្រីមសង់ស៊េរីឆ្នាំ២០១៩ ខ្មៅពាក់ស្លាកលេខ តាកែវ 1P-7914 ប្រាប់ថាទៅយកទូរសព្ទ ដោយសារតែជនរងគ្រោះបានទុកចិត្តទៅលើជនសង្ស័យក៏អោយសោរទៅជនសង្ស័យពេលនោះជនសង្ស័យបានលើកដៃបាយ រួចក៏ជិះម៉ូតូទៅបាត់ស្រមោលតែម្ដង ។
នារីរងគ្រោះបានបន្តទៀតថា នៅព្រឹកថ្ងៃទី១៩ខែមីនាឆ្នាំ២០២១ ស្ត្រីជាជនសង្ស័យបានខលមកនារីរងគ្រោះថា បើចង់បានម៉ូតូរបស់ខ្លួនយកទៅវិញទាល់តែឲ្យលុយមកគេចំនួន 500 ដុល្លារទើបគេយកម៉ូតូទៅឱ្យ ពេលនោះនារីរងគ្រោះបានសួរថាម៉ូតូនៅទីណា ជនសង្ស័យបានឆ្លើយថាម៉ូតូគេយកទៅបញ្ចាំនៅម្ដុំផ្សារឃ្លាំងរំសេវ រួចនារីរងគ្រោះក៏បានទំនាក់ទំនងរហូតមកជួបជនសង្ស័យនៅផ្សារដើមគរហើយក៏ឡើងជិះ passapp ទៅកន្លែងប្រចាំម៉ូតូ នៅសង្កាត់ទឹកល្អក់៣ ខ័ណ្ឌទួលគោក រួចមកក្រុមគ្រួសារនារីរងគ្រោះបានឃាត់ស្ត្រីជាជនសង្ស័យនិងបានរាយការណ៍ទៅសមត្ថកិច្ចប៉ុស្តិ៍នគរបាលរដ្ឋបាលទឹកល្អក់ទី៣ដើម្បីយកជនសង្ស័យយកទៅសួរនាំ ។
ក្រោយពីសមត្ថកិច្ចសួរនាំរួចទើបដឹងថាករណីនេះកើតនៅឃុំកំរៀងស្រុកសំរោងខេត្តតាកែវទើបសមត្ថកិច្ចប៉ុស្តិ៍នគរបាលទឹកល្អក់ទី៣ សហការជាមួយប៉ុស្តិ៍នគរបាលកំវៀងដើម្បីឲ្យមកយកជនសង្ស័យយកទៅចាត់ការតាមនីតិវិធីច្បាប់៕
