រោងចក្រ ធី.អេស.ស្ព័ត នាំយកអំណោយទៅជូនរដ្ឋបាលខេត្តកំពង់ស្ពឺ សម្រាប់យុទ្ធនាការប្រយុទ្ធប្រឆាំងជំងឺកូវីដ

(កំពង់ស្ពឺ)៖ នៅព្រឹកថ្ងៃទី២១ ខែមករា ឆ្នាំ២០២២នេះ គណៈគ្រប់គ្រង និងបុគ្គលិក រោងចក្រ ធី.អេស.ស្ព័ត បានចូលជួបសម្ដែងការគួរសមជាមួយ ឯកឧត្តម វ៉ី សំណាង អភិបាលខេត្តកំពង់ស្ពឺ និងនាំយកអំណោយមួយចំនួនជូនរដ្ឋបាលខេត្តផងដែរ។

នាឱកាសនោះ ឯកឧត្តម វ៉ី សំណាង បានថ្លែងអំណរគុណ រោងចក្រ ធី.អេស.ស្ព័ត ដែលបាននាំយកអំណោយមកជួយសាលាខេត្តក្នុងអំឡុងនៃយុទ្ធនាការប្រយុទ្ធប្រឆាំងជាមួយជំងឺកូវីដនេះ។

ជាមួយគ្នានោះ ឯកឧត្តម វ៉ី សំណាង ក៏បានណែនាំឱ្យរោងចក្រ ធី.អេស.ស្ព័ត់ គោរពច្បាប់របស់ប្រទេសកម្ពុជា និងមានទំនាក់ទំនងល្អជាមួយអាជ្ញាធរគ្រប់ជាន់ថ្នាក់ និងរក្សានូវបរិស្ថាន អនាម័យឱ្យបានល្អប្រសើរ ជៀសវាងការបង្កបញ្ហាដល់សុខភាពរបស់បងប្អូន កម្មករ-កម្មការិនី។

ឯកឧត្តម វ៉ី សំណាង ក៏បានសន្យាជួយសម្រសសម្រួលដោះស្រាយនូវបញ្ហាប្រឈមដែលកើតឡើងនៅក្នុងរោងចក្រ ធី.អេស.ស្ព័ត ផងដែរ។

ឯកឧត្តម អភិបាលខេត្តក៏សូមអំពាវនាវឱ្យអ្នកវិនិយោគ ជាពិសេសមិត្តចិន មកដាក់ទុនរកស៊ីនៅក្នុងមូលដ្ឋានខេត្តកំពង់ស្ពឺ ឱ្យបានកាន់តែច្រើន។

លោកស្រី WANG FANG អគ្គនាយករោងចក្រ រោងចក្រ ធី.អេស.ស្ព័ត (ខេមបូឌា) សូមថ្លែងអំណរគុណ ឯកឧត្តម វ៉ី សំណាង អភិបាលខេត្តកំពង់ស្ពឺ និងមន្ត្រីពាក់ព័ន្ធទាំងអស់ ដែលបានជួយអន្តរាគមន៍ទាន់ពេលវេលានៅគ្រាដែលរោងចក្ររបស់លោកស្រីជួបបញ្ហាប្រឈម នាពេលកន្លងមក។

លោកស្រី WANG FANG ក៏បានអំពាវនាវឱ្យកម្មករ-កម្មការិនី ទៅធ្វើការនៅរោងចក្ររបស់លោកស្រី ដែលស្ថិតក្នុងភូមិឯកភាព ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ព្រោះបច្ចុប្បន្ននេះ រោងចក្រនៅខ្វះកំលាំងពលកម្មប្រមាណជាជាង ១០០០នាក់ទៀត។ រោងចក្រផ្ដល់ជូននៅលក្ខខណ្ឌការងារល្អ និងប្រាក់បៀវត្សសមរម្យ អនុឡោមតាមច្បាប់ការងាររបស់ប្រទេសកម្ពុជា។

ជាមួយគ្នានោះរោងចក្រ ធី.អេស.ស្ព័ត (ខេមបូឌា) បាននាំយកនូវអំណោយរួមមាន៖ ថវិកា ចំនួន១០លានរៀល, អង្ករ ចំនួន ១តោន, ទឹកបរិសុទ្ធ ចំនួន ១០០កេះ, ម៉ាស់ ចំនួន ១០០០ប្រអប់ និងអាកុល ចំនួន ១០កាន៕