ថ្លើមធំមែន ! មកនៅជាមួយបានជាង០១ខែហ៊ានលួចយក រថយន្ត ថៅកែរបស់ខ្លួនទៅបាត់
កំពត ៖ បុរសម្នាក់បានមកដាក់ពាក្យបណ្ដឹងនៅប៉ុស្តិ៍នគរបាល ព្រែកត្នោ ដើម្បីអោយសមត្ថកិច្ចជួយអន្តរាគមន៍ ស្រាវជ្រាវតាមរករថយន្តរបស់គាត់មកវិញ ខណៈដែលតៃកុងរថយន្តរបស់ខ្លួនបានលួចបើករថយន្តគេចបាត់ស្រមោល ៖ ហេតុការណ៍ដែលជនសង្ស័យជាតៃកុងបានលួចយករថយន្តថៅកែ របស់ខ្លួននេះកើតឡើងកាលពីវេលាម៉ោង០៧និង៣០នាទីព្រឹកថ្ងៃទី២១ខែមករាឆ្នាំ២០២២ ដោយយកចេញពីចំណុច ត្រពាំងពៅ ស្រុកទឹកឈូ ខេត្តកំពត ។
ជនរងគ្រោះមានឈ្មោះ ម៉ុក ខេន ភេទប្រុសអាយុ៣៩ឆ្នាំជនជាតិខ្មែរ រស់នៅភូមិកោះ ខ្លូកឃុំកំពង់ត្រាច ស្រុកកំពង់ត្រាច ខេត្តកំពត មុខរបរ រត់តាក់សុី ។
ចំណែកជនសង្ស័យមានឈ្មោះ ផាត សុខន ភេទប្រុសអាយុ៣២ឆ្នាំជនជាតិខ្មែរ រស់នៅភូមិ១ ឃុំទន្លេបិទ ស្រុកត្បូងឃ្មុំ ខេត្តកំពង់ចាម ។ ហើយរថយន្តដែលជនសង្ស័យយកទៅម៉ាក សាំងយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ2AG-2120។
បើតាមសម្ដីជនរងគ្រោះជាម្ចាស់រថយន្តបានឲ្យដឹងថា គាត់រកសុី រត់ឡានតាក់សុី ពីកំពតមកភ្នំពេញ ពីភ្នំពេញទៅកំពត ដោយជួលតៃកុងដែលជាជនសង្ស័យបើកបានជាងមួយ ខែមកហើយ លុះនៅថ្ងៃកើតហេតុ ថ្ងៃទី២១ខែមករាឆ្នាំ២០២២ តៃកុងឡានរបស់គាត់បានបើកដឹកភ្ញៀវពីកំពតមកភ្នំពេញដូចរាល់ដង ខណៈមកដល់ភ្នំពេញដាក់ភ្ញៀវចុះអស់ នៅម៉ោងប្រហែល០១រសៀលស្រាប់តែគាត់ជាម្ចាស់រថយន្តបានទាក់ទងតាមរយៈទូរសព្ទ័ដើម្បីដាក់ភ្ញៀវពីភ្នំពេញមកកំពតវិញស្រាប់តែទាក់ទងលែងបាន បាត់ដំណឹងសូន្យរហូតមកដល់ថ្ងៃទី២៤ខែមករាឆ្នាំ២០២២នេះ ៕
