ពលរដ្ឋក្ដៅក្រហាយនិងក្រុមហ៊ុនជីករណ្តៅដីយកអាចម៍ដីលក់ កាយដីបិទផ្លូវ ធ្វេីឲ្យពលរដ្ឋមិនអាចចេញ-ចូលយកគ្រឿងចក្រទៅច្រូតស្រូវបាន
ស្វាយរៀង ៖ ប្រជាពលរដ្ឋភូមិព្រះទន្លេនាំគ្នាតវ៉ានៅសាលាសង្កាត់សង្ឃ័រ សុំឲ្យអាជ្ញាធរដោះស្រាយមូលហេតុ គឺក្រុមហ៊ុនជីករណ្តៅដីយកអាចម៍ដីលក់មួយកន្លែងធ្វើសកម្មភាពកាយដីបិទផ្លូវ បង្កឱ្យប្រជាពលរដ្ឋមិនអាចចេញ-ចូលយកគ្រឿងចក្រទៅច្រូតស្រូវបាន ហើយការដឹកដីនេះ ធ្វើឲ្យបាក់ស្រុតផ្លូវប្រឡាយជារណ្តៅក្រហេងក្រហូងរអឹល ពិបាកធ្វើដំណើរ និងដឹកដីលើសទ្រុងជ្រុះធ្លាក់លើផ្លូវជាតិលេខ១៣ បង្កហានិភ័យគ្រោះថ្នាក់ដល់អ្នកធ្វើដំណើរ ពេលមានភ្លៀងរអឹល ពេលថ្ងៃក្តៅហុយ ប៉ះពាល់ដល់សុខភាពប្រជាពលរដ្ឋដែលរស់នៅជិតផ្លូវជាតិលេខ១៣នេះ ទើបប្រជាពលរដ្ឋតវ៉ាសុំឲ្យអាជ្ញាធរសង្កាត់សង្ឃរ័ ជួយអន្តរាគមន៍និងដោះស្រាយ។
ប្រជាពលរដ្ឋបានលើកឡើងទៀតថា កន្លងមក មានក្រុមអាជីវកម្មជីករណ្តៅដីយកអាចម៍ដីលក់ នៅជាប់រណ្តៅដីថ្មីនេះ គឺជីកទំហំធំជាង០៣ហិកតា ជម្រៅ៨ម៉ែត្រ ជីកជាប់ភ្លឺស្រែរបស់ប្រជាពលរដ្ឋបច្ចុប្បន្នគឺបាក់ដី ជិតដល់ដីស្រែរបស់ពួកគាត់ ទើបពួកគាត់មកតវ៉ាបែបនេះ ។
ប្រជាពលរដ្ឋតវ៉ាបានកើតឡើងកាលពីព្រឹកថ្ងៃទី១៨ ខែវិច្ឆិកា ឆ្នាំ២០២២ នៅសាលាសង្កាត់សង្ឃ័រ ក្រុងស្វាយរៀង តែពុំទាន់មានដំណោះស្រាយឡើយ។
លោកស្រីសុក ណន ចៅសង្កាត់សង្ឃ័របានប្រាប់អ្នកសារព័ត៌មានយើងថា លោកស្រីបានដឹកនាំកម្លាំងសមត្ថកិច្ចចុះទៅពិនិត្យទីតាំង ដែលប្រជាពលរដ្ឋប្តឹងនោះហើយ គឺក្រុមហ៊ុនឈ្មោះម៉េង សាន មេការតំបន់សេដ្ឋកិច្ចពិសេស ជីលូ បានយកគ្រឿងចក្រទៅ កាយដីភ្លឺភ្លោះរបស់ប្រជាពលរដ្ឋនិងកាយដីបិទផ្លូវប្រជាពលរដ្ឋពិតប្រាកដមែន ។
ក្រុមហ៊ុននេះ បានជីកកកាយផ្លូវ ភ្លឺភ្លោះ របស់ប្រជាពលរដ្ឋខូចអស់ប្រវែង៨០ម៉ែត្រ ដាក់គ្រឿងចក្រកាយបិទផ្លូវប្រជាពលរដ្ឋ មិនអាចយកគ្រឿងចក្រចូលទៅច្រូតស្រូវបាន ខណៈស្រូវទុំពេញស្រែ។
ហើយរថយន្តដឹកអាចម៍ដីបានបើកកិនស្រូវរបស់ប្រជាពលរដ្ឋខូចមួយចំនួន និងបានស្រុតផ្លូវ និងដឹកដីខុសបច្ចេកទេស ដឹកលើសទ្រុង គ្មានគ្របបង្កឲ្យអាចម៍ដីជ្រុះធ្លាក់ លើផ្លូវជាតិលេខ១៣ បង្កហានីភ័យ គ្រោះថ្នាក់ដល់អ្នកធ្វើដំណើតាមដងផ្លូវ។
លោកស្រីបន្តទៀតថា លោកស្រីបានសុំឲ្យឈ្មោះម៉េង សាន មេការតំបន់សេដ្ឋកិច្ចជីលូ ផ្អាកសកម្មភាពសិន ដើម្បីដោះស្រាយជូនប្រជាពលរដ្ឋ និងឲ្យក្រុមហ៊ុនកាយដីលើកភ្លឺភ្លោះបើកផ្លូវឲ្យប្រជាពលរដ្ឋយកគ្រឿងចក្រចូលទៅច្រូតស្រូវក៏ប៉ុន្តែ ឈ្មោះម៉េងសាន មិនស្តាប់អាជ្ញាធរមូលដ្ឋានទេ គឺផ្គើនអាជ្ញាធរ លោកស្រីក៏បានរាយការណ៍ជូនលោកអភិបាលក្រុងស្វាយរៀងជួយអន្តរាគមន៍ និងសួររកអាជ្ញាបន័ធ្វើអាជីវកម្មក្រុមហ៊ុនឆ្លើយថា គេមានអាជ្ញាបណ្ណពីក្រសួង ។
នៅព្រឹកថ្ងៃទី១៨ វិច្ឆិកា ដដែលនេះ លោកអភិបាលក្រុងស្វាយរៀង បានចាត់លោកអភិបាលរងក្រុង១រូប និងមន្ត្រីជំនាញចុះទៅពិនិត្យទីតាំងកើតហេតុ ហើយបានអញ្ជើញលោកម៉េង សាន ជាម្ចាស់អាជីវកម្មជីករណ្តៅដីលក់ និងលោកមេភូមិព្រះទន្លេ ព្រមទាំងប្រជាពលរដ្ឋរងគ្រោះ ក្រុមប្រឹក្សាសង្កាត់មកដោះស្រាយនៅសាលាសង្កាត់សង្ឃ័រ ក៏ប៉ុន្តែឈ្មោះម៉េង សាន មិនបានចូលរួមទេ បានឲ្យតំណាងម្នាក់មកចូលរួមដោះស្រាយ តែអ្នកមកជាតំណាងត្រូវឈ្មោះម៉េង លី មិនអោយផ្តិតមេដៃលើកំណត់ហេតុទេ ។
អាអាជ្ញាបានលួចខ្សឹបប្រាប់អ្នកសារព័ត៌មានយើងឲ្យដឹងថា ឈ្មោះម៉េង សាន គ្មានអាជ្ញាបណ្ណធ្វើអាជីវកម្មជីករណ្តៅដីយកអាចម៍ដីលក់នោះទេ ក្រសួងបានជម្រាបមកលោកស្រីចៅសង្កាត់ថា គ្មានឈ្មោះម៉េង សាន នៅក្នុងបញ្ជីរបស់ក្រសួងទេ។
លោកស្រីសុក ណន បញ្ជាក់ថា លោកស្រីបានទូរសព្ទ័សួរទៅឈ្មោះ ម៉េងសាន គឺឆ្លើយតបយ៉ាងខ្លីថា «បើមានបញ្ហាអី តេទៅលោកហែម ពិសិដ្ឋអភិបាលរង ខេត្តស្វាយរៀងទៅ»។
លោកស្រីហួសចិត្ត ដោយឈ្មោះម៉េង សាន ហ៊ានយកឈ្មោះលោកអភិបាលរងខេត្ត មកគំរាមអាជ្ញាធរមូលដ្ឋាន បុគ្គលនេះអាងខ្នងអ្នកធំ ឬយកឈ្មោះលោកអភិបាលរងខេត្តមកគំរាម ។ លោកស្រីសុក ណាន បានមានប្រសាសន៍ថា លោកស្រីតំណាងឲ្យប្រជាពលរដ្ឋ ដូច្នេះធ្វើការបម្រើប្រជាពលរដ្ឋ លោកស្រីសូមអំពាវនាវដល់ឯកឧត្តមអភិបាលខេត្តស្វាយរៀង និងឯកឧត្តមក្រសួងរ៉ែ និងឋាមពល មេត្តាចុះពិនិត្យនិងដដោះស្រាយផង ។
លោកប៉ាត់ សាក់ ប្រធានការិល័យធនធានរ៉ែនៃមន្ទីររ៉ែ និងថាមពលខេត្តបានមានប្រសាសន៍ថា ករណីក្រុមហ៊ុនអាជីវកម្មជីករណ្តៅដីចំនួន២ នៅចំណុចភូមិព្រះទន្លេ សង្កាត់សង្ឃ័រ គឺសុំច្បាប់សាលាក្រុងស្វាយរៀង ដោយថ្នាក់ជាតិធ្វើប្រតិភូកម្មឲ្យថ្នាក់ស្រុកក្រុងអនុញ្ញាតធ្វើអាជីវកម្មចល័តលើផ្ទៃដីក្រោម១ហិកតា ជម្រៅ០៣ម៉ែត្រ ចំណែកមន្ទីរគ្រាន់តែពិនិត្យលើបច្ចេកទេស និងបង់សួយសាករប៉ុណ្ណោះ ។
ច្បាប់ជីកត្រឹម០៣ម៉ែត្រ ជាក់ស្តែងជីកដល់ក្បាលប្រែតហើយ ថ្នាក់ក្រោមជាតិអនុញ្ញាតត្រឹមក្រោម១ហិកតា សូមអាជ្ញាធរខេត្តចុះពិនិត្យមើលផង ។
ពលរដ្ឋបានលើកឡើងបន្ដទៀតថា បើក្រឡេកមើលនៅលើផ្លូវកៅស៊ូផ្លូវជាតិលេខ ១៣ វិញ នៅចំណុចចេញ.ចូលមានជ្រុះអាចម៍ដីប្រឡាក់ផ្លូវបណ្ដាលឲ្យហុយប៉ះពាល់ដល់អ្នកធ្វើដំណើរ មើលអ្វីសឹងមិនឃើញរីឯរថយន្តវិញ មិនមានការគ្របតាមលក្ខណៈបច្ចេកទេសត្រឹមត្រូវនោះទេ ៕
